УИХ-ын ээлжит бус чуулганы өнөөдрийн (2024.08.27) хуралдаан эхэллээ.

Өнгөрсөн баасан гарагийн чуулганы нэгдсэн хуралдаанаар хэлэлцэж байсан гурван хуулийн төслийг эргэн нягталж, бүлэг байр сууриа нэгтгэхийн тулд завсарлага авсан.

• Нэгд, Төсвийн тогтвортой байдлын тухай хуульд нэмэлт,  өөрчлөлт оруулах тухай хуулийн төсөлд заасан төсвийн төлөвлөлт, хяналт, эдийн засгийн аюулгүй байдал зэрэг асуудлуудад бүлгийн гишүүд байр сууриа нэгтгэн дахин хэлэлцэхийн тулд завсарлагаа үргэлжлүүлэн авч, хэлэлцэх
• Хоёрт, Монгол Улсын 2024 оны Төсвийн тухай хуульд нэмэлт өөрчлөлт оруулах хуулийн төсөлд тухайн жилийн төсвийн төслийг  жил бүрийн 10 дугаар сарын 1-нд УИХ-д өргөн барихаар өөрчилсөн. Гэвч бүлгийн гишүүд одоо хүчин төгөлдөр мөрдөж буй заалтаараа буюу 9 дүгээр сарын 1-ний дотор  өргөн мэдүүлж байхыг олонх нь дэмжиж, хуулийн төслийг буцаах нь зүйтэй гэж үзлээ. Учир нь хуулийн төслийг өргөн мэдүүлснээс хойш аудитын дүгнэлт гаргах, олон нийтээр хэлэлцүүлэх цаг хугацааг үлдээх
• Гуравт, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай  хуулийн төсөлд улсын төсөв батлах УИХ-ын онцгой бүрэн эрхэд халдсан байж болзошгүй гэсэн зүйл, заалтыг эргэн харах.

УИХ дахь МАН-ын бүлгийн дарга Л.Мөнхбаатар Төсвийн тогтвортой байдлын тухай хуульд нэмэлт, өөрчлөлт оруулах хуулийн төслийг бүлгээрээ үргэлжлүүлэн хэлэлцэх шаардлагатай учраас нэг хоногийн хугацаатай завсарлага авахыг хүссэн. УИХ-ын дарга Д.Амарбаясгалан, УИХ-ын дэгийн тухай хуулийн дагуу МАН-ын бүлгийн хүсэлтийг хүлээн авч, 2024 оны 8 дугаар сарын 27-ны өдөр буюу мягмар гарагийн 10:00 цаг хүртэл завсарлага авах хугацааг сунгасан юм.

УИХ-ын дарга Д.Амарбаясгалан:

-Намын бүлгүүд хуралдаад асуудлаа ярьсан. Тиймээс санал хураалтаар асуудлаа шийднэ. Гишүүд ойлголт мэдээллээ нэгтгэсний дараа олон нийтэд мэдээлэл хүргэх шаардлагатай байна. УИХ-ын гишүүн Г.Тэмүүлэн одоо дэгээ баримтална шүү.

УИХ-ын гишүүн П.Сайнзориг:

-Төсвийн тодотголыг зарчмын хувьд дэмжиж байна. Улсад тулгамдсан олон асуудлыг эхнээс нь шийдээд явъя гэж байна. Тухайлбал, нефтийн үйлдвэрээ, төв цэвэрлэх байгууламжаа дуусгачихмаар байгаа.

Хот дундуураа аюултай, ачаа бараа тээвэрлэдэг нийслэл манайхаас өөр байхгүй болчихлоо. Тэгэхээр Туулын хурдны замыг эхлүүлснээр энэ асуудлыг шийдэж чадах болов уу гэж бодож байна. Энэ мэтчилэн төсвийн тодотголын ач холбогдлыг яривал чухал асуудлууд бий. Тиймээс дэмжиж байгаа.