НҮБ-ын Ерөнхий ассамблейн шийдвэрээр Дэлхийн хэвлэлийн эрх чөлөөний өдрийг жил бүрийн тавдугаар сарын 3-ны өдөр тэмдэглэдэг бөгөөд энэ жил 30 жилийн ойгоо ХҮНИЙ ЭРХЭД СУУРИЛСАН ИРЭЭДҮЙГ БҮТЭЭХ НЬ: Үзэл бодлоо илэрхийлэх эрх чөлөө хүний эрхийн хөшүүрэг уриатайгаар дэлхий дахинд тэмдэглэлээ.

Хүний эрхийн түгээмэл тунхаглал батлагдсаны 75 жил, Хүний эрх хамгаалагчдын тунхаглал батлагдсаны 25 жилийн ой тохиосон энэ цаг үед ЮНЕСКО-гийн Үндэсний комисс, Хүний эрхийн Үндэсний комисс, Монголын Эмнести Интернэшнл, Глоб Интернэшнл Төв, Монголын Сэтгүүлчдийн Нэгдсэн Эвлэл, Монголын Хэвлэлийн Хүрээлэн, Монголын Хэвлэл Мэдээллийн зөвлөл зэрэг байгууллагууд “Үзэл бодлоо илэрхийлэх эрх чөлөө хүний эрхийн хөшүүрэг мөн” уриан дор нэгдэж,

• үзэл бодлоо чөлөөтэй илэрхийлэх,
• эвлэлдэн нэгдэх,
• мэдээлэл авах эрх, эрх чөлөөний эрх зүйн орчны тулгамдсан асуудал,
• хэвлэл мэдээллийн хариуцлага, ёс зүй,
• сэтгүүлчдийн аюулгүй байдал,
• хэвлэл мэдээллийн хөгжлийн чиг хандлагыг ил тодоор хэлэлцэж, асуудал дэвшүүлэх, шийдэл эрэлхийлэх, эв санааны нэгдлээ илэрхийлэх аяныг зохион байгуулжээ.

Энэ өдөр Монголын сэтгүүлчдийн нэгдсэн эвлэл "Үзэл бодлоо илэрхийлэх эрх чөлөөний форум-2023"-ыг Блю скай зочид буудалд зохион байгууллаа. Тус арга хэмжээнд Монголд үйл ажиллагаа явуулж буй хэвлэл, мэдээллийн байгууллагын сэтгүүлч, эрхлэгчид оролцож хэвлэн нийтлэх эрх чөлөө хэрхэн хумигдаж байгаа асуудлыг хэлэлцсэн байна.