НҮБ-ын Хүүхдийн Сан нь Дэлхийн Хүүхдийн Өдөр буюу Хүүхдийн эрхийн конвенц батлагдсан арваннэгдүгээр сарын 20-ны өдрийг хамтран ажиллагч талууд, хүүхэд залуустайгаа тэмдэглэн өнгөрүүлдэг.

Энэ жил НҮБ-ын Хүүхдийн Сан уг өдрийг тохиолдуулан Хүндэтгэлийн Гала үдшийн арга хэмжээг өнөөдөр буюу арваннэгдүгээр сарын 18-ны өдөр зохион байгуулав. Уг арга хэмжээгээр агаарын бохирдолтой тэмцэх “Агаар нэг” хөтөлбөрт хөрөнгө босгож хүүхэд, залуусын эрүүл аюулгүй орчинд амьдрах эрхийг хангахаар зорьж байна.

Энэ үеэр цэнхэр хивсний ёслол, Монголын урлаг соёлын шилдгүүдийн тоглолт, хосгүй уран зураг, бүтээлийн хандивын дуудлага худалдаа болсон юм. Уг арга хэмжээнд зориулсан нэг төгрөг бүр гэр хороололд амьдарч буй хүүхдүүдийн амьдрах орчин, агаарын чанарыг сайжруулахад зориулагдах болно гэдгийг онцлов.

НҮБ-ын Хүүхдийн Сан нь агаарын бохирдлоос үүдэлтэй эх хүүхдийн эрүүл мэндэд үзүүлж буй сөрөг нөлөөллийг бууруулах чиглэлд олон төрлийн арга хэмжээ авч ажилладгийн нэг нь Нүүрсгүй шийдэл-Монгол гэрийн дулаалга, халаалт, агаар сэлгэлтийн ЧИП багц юм. Үүнийг ашигласнаар хүүхэд, жирэмсэн эх, өндөр настан гэртээ нүүрс хэрэглэлгүйгээр өвлийг тав тухтай, өнтэй давах нөхцөлөөр хангагдах юм.

ЧИП багцыг тухайн орон нутгийн өрхийн үйлдвэрлэл, жижиг дунд бизнес эрхлэгч нар үйлдвэрлэдэг бөгөөд зах зээлийн өртөг гурван сая төгрөг байна. Одоогийн байдлаар НҮБ-ын Хүүхдийн Сангийн хөрөнгө оруулалт, донорууд болон орон нутгийн хөрөнгө оруулалтын тусламжтайгаар нийт 6 аймаг 2 дүүргийн 2000 орчим өрх, 25 гэр цэцэрлэг ЧИП багцтай болж эрүүл аюулгүй орчинд амьдрах эрхээ баталгаажуулжээ. 

Чип багцыг ашигласнаар нэг өрхийн түлшний зардал сард дунджаар 42 мянган төгрөгөөр буурахаас гадна, нүүрс, түлээнээс гарах хог хаягдал 66 хувиар буурна. Мөн нүүрс гал түлэхэд зарцуулдаг цаг багасгахын хэрээр, гэрийн дотор орчны агаарын чанар сайжирч, хүүхэд халуун зууханд түлэгдэх эрсдэл ЧИП-тэй айлуудад байхгүй болсон байна.

Гэрэл зургуудыг Б.Даваа