Дөрвөн жил тутам дэлхийн хүмүүсийн хүсэн хүлээдэг наадам болох Олимп албан ёсоор эхэллээ.  

Франц улсын нийслэл Парис хотноо болж буй энэ удаагийн наадмын нээлт анх удаа цэнгэлдэхийн гадна буюу Сена мөрөн дагуу боллоо. Ингэснээр 100 жилийн дараа Парис хотноо зуны олимп дахин болж байгаа аж. Сонирхуулахад тус хотод өмнө нь түүхэндээ хоёр удаа Олимп болж байсан ба тодруулбал тэртээ 1900, 1924 онуудад болж байв.

Олимпын зохион байгуулах хорооны мэдээлснээр 10,500 орчим тамирчин наадамд оролцох төлөвтэй байна. Улс орнуудын баг тамирчид усан онгоцон дээр зогсон Сена мөрний дагуу явсан нь онцгой байлаа.

Нээлтийн үеэр Лэди Гага ая дуугаа өргөсөн бол Селин Дион Эйфелийн цамхгийн өмнө "L'Hymne à l'amour" хэмээх франц дууг дуулж ёслолыг хаалаа. Мөн урлаг соёлын олны танил хүмүүс нээлтийн ажиллагаанд хүрэлцэн иржээ.

Францын Ерөнхийлөгч Эммануэль Макрон наадмыг албан ёсоор нээж бамбарын буухиа үргэлжилсэн юм. Энэ удаагийн бамбарын буухиан нэг онцлог нь тамирчид нэг нэгэндээ дамжуулдаг байсан бол бамбар хүргэж ирсэн тамирчин үлдэлгүй цааш хамт явж эцсийн цэгт хүртэл хамтдаа гүйв.

Хэдий гадаа бороо шивэрч байсан ч Сена мөрний эрэг дагуу 300 мянга гаруй үзэгч, нээлтийн ёслолыг үзэж сонирхжээ. Нээлтийн үеэр аюулгүй байдлыг сахиж, 45 мянган цагдаагийн албан хаагч ажиллажээ.