Улаанбаатар хотын захирагч Х.Нямбаатар Дулааны IV цахилгаан станцын урд талд голын голдирол хаасан байршилд ажиллаж, мэдээлэл өгч байна.

Х.Нямбаатар, Зургаадугаар сарын 1-ээс Дулааны IV цахилгаан станц хэсгийн зорчих хэсгийг нээмэгц түр гүүрийг буулгаж, дунд голын усны урсцыг нэмэгдүүлэх ажлыг хийнэ. Тус хэсэгт тэгшилгээнүүдийг мөн хийсэн бөгөөд гадна талаас нь бетонон хавтангаар бэхжүүлэх ажлыг хийнэ. 

Ер нь дунд гол руу маш олон ААН түрж ороод шороо асган барилга байгууламж барьснаас болж өнгөрсөн зуны үер тохиосон гэдгийг мэргэжлийн байгууллагынхан дүгнэж гаргасан. 

"Ноц" хэмээх компанийн газрын зөвшөөрлийг бүхэлд нь хүчингүй болгож, нүүлгэн шилжүүлэхээр байна. Мөн "Эрдэм транс"-ын нэг сэндвичэн барилгыг бүхэлд нь нураах зэрэг ажлууд хийгдэхээр байна. 

Ус урсах нөхцөлийг сайжруулахын тулд лагийг чөлөөлөх, газар ухах зэрэг ойролцоогоор 10 гаруй тэрбум төгрөгийн ажил хийхээр байна. Хэрэв бургасыг бид өөрсдөө чөлөөлөх шаардлагатай болбол нийслэлийн төсөв яагаад ч хүрэлцэхгүй. Тиймээс ойрын хугацаанд Засгийн газрын хуралдаанд танилцуулж Байгаль орчны зарим хуульд өөрчлөлт оруулах шаардлагатайг өргөн барина. 

Нийслэлийн иргэддээ хандаж хэлэхэд, зуны үерээс сэргийлэх ажлыг дөрөвдүгээр сарын 1-ээс хийнэ. Иймд иргэд, ААН-үүд гол руу шахаж орсон газраа чөлөөлөх нийслэлийн албан шаардлагыг хүндэтгэлтэйгээр хүлээж авахыг хүсье гэв.