Засгийн газрын лхагва гараг бүрийн ээлжит хуралдаан үргэлжилж байна.

Өнөөдөр:

• Хувийн хэвшлээр гүйцэтгүүлэх ажил, үйлчилгээний талаар авах зарим арга хэмжээний тухай Засгийн газрын тогтоол,

• Автомат удирдлагатай чингэлэг тээврийн терминал байгуулах тухай Засгийн газрын тогтоол,

• Мэргэжлийн хяналтын ерөнхий газрын үйл ажиллагаа, зохицуулалттай холбоотой эрх зүйн орчныг боловсронгуй болгох талаар,

• Дархан арьс ширний цогцолбор байгуулах төслийн явц,

• Буянт-Ухаа инновацын төв байгуулах талаар,

• Орон сууцны хороолол, барилгад хүүхдийн цэцэрлэг байгуулах талаар авах арга хэмжээний тухай зэрэг 25 асуудал хэлэлцэх болон танилцахаар төлөвлөөд байна.

Хуралдаанаас гарсан шийдвэрийг шууд дамжуулан хүргэх болно.

-Сангийн сайд Б.Жавхлан:
-Засгийн газраас импортын зарим бараа бүтээгдэхүүний гаалийн татварын тогтоолд өөрчлөлт орууллаа. Цементийн төрлийн бүх бүтээгдэхүүний гаалийн албан татвар 20 хувь байсныг он дуустал тэглэх шийдвэр гарлаа. Цаг үетэй холбогдуулан ийн шийдвэрлэлээ.

Улаанбаатар-Дарханы замын бүтээн байгуулалт зургаа дахь жилдээ үргэлжилж байна. Энэ замыг 2022 ондоо багтаан хатуу хучилттай болгон бүрэн хөдөлгөөнийг нь нээхээр ажиллаж байна. Цементийн нийлүүлэлт тасрахгүй бол энэ зорилтыг бид хангаж ажиллаж чадна.

Цементийн үнийн өсөлт 500-600 мянган төгрөгт хүрсэн. Бидний тооцоолсноор уг шийдвэрийн дараа  үнийн өсөлт 400 мянгад хүрэх төлөвтэй байна. Монголын цементийн үйлдвэрүүд бүрэн хүчин чадлаараа ажиллаж байгаа ч дотоодын хэрэгцээг хангаж дийлэхгүй байна. Дотоодын үйлдвэрүүд өвөл, хаварт зах зээлийн өсөн нэмэгдэж буй хэрэгцээг тодорхойлон бүрэн хүчин чадлаараа ажиллахгүй нөхцөл байдал үүссэн.

Дотоодын үйлдвэрүүд зогсолтгүй ажиллавал тус бүр жилд 1 сая тонн цемент үйлдвэрлэж чадна. Гэхдээ тодорхой шалтгааны улмаас бүрэн хүчин чадлаараа ажиллаж чадахгүй байгаа болохоор цаг үеэ дагаж ийм шийдвэр гаргалаа.

-Долларын ханшийн өсөлтөд хэрхэн анхаарч байна вэ?
-Төлбөрийн тэнцлийн алдагдлаас болж ханшинд дарамт ирж байна. Үүнд засгийн газраас зөвхөн Монголбанк хариуцах ёстой гэхгүй байгаа. Тавдугаар сараас эхлэн экспортод анхаарч нүүрсний экспортыг 2019 онд хамгийн өндөр хэмжээнд хүргэж байсантай ижил түвшинтэй болгосон.  

Оюутолгой, Таван толгой болон бусад уурхай дагасан гэрээнүүдээс төлбөр авах, Сангийн яамнаас 2023 онд төлөвлөж байсан урт хугацааны нэн хөнгөлөлттэй хөгжлийн зээлийг энэ ондоо багтаан татаж авах боломжуудыг ашиглаж байна. Он гараад Азийн хөгжлийн банкнаас авах байсан нэн хөнгөлөлттэй 100 сая ам.долларын зээлийг энэ долоо хоногт авч байна.

-Хөгжлийн банкны эргэн төлөлтийн тухайд?
- Хөгжлийн банкны эргэн төлөлт гурав, дөрөв, тав, зургаадугаар сарынхтай харьцуулбал эрч нь буурч байна. Үүнийг бид олон нийтэд мэдээлж байгаа. Яамд, төрийн өмчийн компаниудтай холбоотой асуудлаар эргэн төлөлт удааширч байна. Засгийн газрын хуралдаанаар энэ талаар өнгөрсөн долоо хоногт шийдвэр гаргасан. Есдүгээр сар дуустал үр дүнг харъя. Аравдугаар сард нэгдсэн мэдээлэл өгнө.

800-гаас 1 их наяд төгрөгийн эргэн төлөлт хийлгэхээр ажиллаж байгаа.

-НӨАТ-ын сугалааны талаар мэдээлэл өгөөч?
-НӨАТ-ын сугалааг аравдугаар сараас эхлүүлнэ.

НӨАТ-ын сугалаанд нэлээд дэвшилттэй ажлууд хийсэн. Уншуулсан, уншуулаагүй бүх сериал дугаарыг сугалаанд хамруулдаг байсан. Тэгвэл аравдугаар сараас зөвхөн уншуулсан, идэвхжүүлсэн   НӨАТ-ын баримтад сугалаа явуулна.

Иргэд ухаалаг утаснаасаа өөрийнхөө бүртгүүлсэн баримт сугалаанд бүртгэгдсэн эсэхийг хянах боломжтой. Азтан шалгаруулах үйл явцыг хянана гэсэн үг. Сонирхолтой, сайжруулсан байдлаар сугалааг зохион байгуулна.

Тавдугаар сараас НӨАТ-ын сугалааг зогсоосноор баримт бүртгүүлэх тоо 50 хувиар буурсан. Энэ нь НӨАТ-ын орлогод сөргөөр нөлөөлөх эрсдэл гарч байгаа юм. Энэ нь далд эдийн засгийг дэмжихэд нөлөөлж болзошгүй.