Өнөөдрийн чуулганы нэгдсэн хуралдаанаар “Нийслэл Улаанбаатар хотын 2040 он хүртэлх хөгжлийн ерөнхий төлөвлөгөөг батлах тухай” Улсын Их Хурлын тогтоолын төслийг хэлэлцэж байна.

УИХ-ын гишүүн Н.Номтойбаяр “Түүхэн бодлогын баримт бичиг барим орж ирж байна. Түүхэндээ анх удаа нийслэлийнхээ ерөнхий төлөвлөгөөг оруулж ирж байна. Нийслэлийн 2040 эдийн засгийн суурь тооцооллыг хэрхэн, яаж тооцоолсон бэ. Нийслэлийн өөрийн орлого 5.3 их наяд, энэ чинь улсын төсвийн 50 хувьтай тэнцэж байна. Энэ төлөвлөгөөг хэрэгжүүлэхэд УИХ-ын үүрэг хариуцлага маш чухал. УИХ-д ямар үүрэг хариуцлага ирэх вэ. Үүнд хуулийн тооцоолол хийсэн үү" гэлээ.

Ерөнхий сайд Л.Оюун-Эрдэнэ “Нийслэлийн ерөнхий төлөвлөгөөг бүгд хамтдаа нэгдсэн ойлголттой болгохоор төлөвлөөд байна. Яам тус бүрд өөр өөр төслүүдийг эхлүүлчихсэн. Нэгдсэн ойлголт байхгүйгээс ТЭЗҮ нь бүгд зөрчихсөн. Тиймээс төслүүдийг эрэмбэлэх нь зөв юм. Жишээлбэл, газрын дор шугам барьчихсан байж, хөрөнгө оруулалт татаагүйгээс 2 тэрбум ам.доллар шаардлагатай болчихсон.

Гэтэл улсын төсвөөс 1 тэрбум ам.доллар оруулахад л төлбөрийн тэнцэл алдагдчихдаг. Бид улсын төсвөөс хөрөнгө оруулалт оруулж чадах уу үгүй юу. Нийслэлд хэрэгжиж буй нийт төслийг хэрэгжүүлэхэд багадаа 70 орчим тэрбум ам.доллар шаардагдана. Энэ их санхүүжилтийг бид яаж босгох юм. Улсын төсвөөс энэ мөнгийг босгоно гэвэл 30 жил шаардагдана. Энэ бол гашуун үнэн. Тиймээс УИХ, Засгийн газар, нийслэлээс дэмжлэг авах нь зөв.  

Хаа нэгтэйгээс цагаан морьтой ханхүү хүрч ирээд нийслэлийг хөгжүүлчихгүй. Тиймээс нэгдсэн ойлголттой, үе шаттай, аль төслийг хаанаас эхлүүлэх вэ гэдгийг эрэмбэлэх нь зөв” гэлээ.