Агаарын бохирдлыг бууруулах хүрээнд утааны асуудлаарх бодлого, шийдвэрийн хэрэгжилтийн үр дүн, шийдэл” ерөнхий хяналтын сонсгол хоёрдугаар сарын 2-3-ны өдрүүдэд болж байна.

Өнөөдрийн сонсголд

• “Агаарын бохирдол-хүн амын эрүүл мэнд (Амьд явах, эрүүл, аюулгүй орчинд амьдрах эрх) нэг дэх хэлэлцүүлгийн талаар Улсын Их Хурлын гишүүн, Хүний эрхийн дэд хорооны дарга С.Эрдэнэболд,
• “Утааны асуудал: Стандарт, хяналт (Зуух, түлшний технологи) сэдэвт хэлэлцүүлгийн талаар Улсын Их Хурлын гишүүн З.Мэндсайхан нар тус тус танилцуулна.  

Утааны асуудлаар хяналтын сонсгол явуулах талаар Монгол Улсын иргэн Б.Мөнгөнхишиг нарын цахим системд байршуулсан нийтийн өргөдөл Монгол Улсын Их Хурлын тухай хуулийн 39 дүгээр зүйлийн 39.4.2-т заасан тоонд хүрсэн.

Иймд Монгол Улсын Их Хурал авч хэлэлцэн 2024 оны 12 дугаар сарын 19-ний өдрийн Байгаль орчин, хүнс, хөдөө аж ахуйн хорооны хуралдаанаар утааны асуудлаар ерөнхий хяналтын сонсгол явуулахыг хуралдаанд оролцсон гишүүдийн олонх дэмжсэн.

Мөн хуралдаанаар Ерөнхий хяналтын сонсголын бэлтгэл ажлыг хангах, зохион байгуулах ажлыг хэсгийг 22 гишүүний бүрэлдэхүүнтэй байгуулж, Ажлын хэсгийн ахлагч, сонсгол даргалагчаар Улсын Их Хурлын гишүүн Ж.Чинбүрэнг сонгосон юм.

Утааны ерөнхий хяналтын сонсголын өмнө Ажлын хэсэг цуврал хэлэлцүүлгийг хийсэн. Хэлэлцүүлгүүдийн үеэр судлаачдын танилцуулсан дүгнэлтийн талаар УИХ-ын гишүүн С.Эрдэнэболд танилцууллаа. 

Энэ үеэр тэрбээр "Шахмал түлшийг хамаагүй яривал улс төрчдийг уурлуулж магадгүй гэсэн айдас шинжээчдэд байна.

Тийм ч учраас энэ чиглэлээр хийсэн судалгаа дутмаг байна. Үүнээс болж амь хохирсон хүн байгаа ч үүний талаар зоригтой дуугарах хүн алга" гэсэн юм. 

Анагаах ухааны доктор, дэд профессор Б.Сувд агаарын бохирдол хүний эрүүл мэндэд яаж сөргөөр нөлөөлөх талаар танилцуулав.

Тэрбээр, Агаарын бохирдол үндэсний стандарт болон ДЭМБ-ын зөвлөмж хэмжээнд хүртэл буураагүй тул хүний эрүүл мэнд, амь насанд сөргөөр нөлөөлсөөр байна. 

Агаарын бохирдол нь 

• Уушгины хатгалгааны 18 хувь,
• Уушгины архаг бөглөрөлт өвчний 13 хувь
• Тархины судасны өвчний 31 хувь
• Зүрхний ишемит өвчний 32 хувьд нөлөөлж байна.

Тавантолгойн барьцалдуулагчийн чанарыг үнэлэхэд хүндрэлтэй байна

Шинжлэх ухааны доктор Ж.Нарангэрэл, Сайжруулсан шахмал түлшний түүхий эд Тавантолгойн нүүрс нь байгаль орчинд хортой элементүүд маш багатай болох нь олон судалгаагаар батлагдсан. Үндсэн түүхий эд миддлинг нь Багануурын түүхий нүүрстэй харьцуулбал чийглэг болон дэгдэмхий бодисын агуулга бага, илчлэг өндөр давуу шинж чанаруудтай боловч үнслэг болон хүхэр харьцангуй ихээр агуулдаг дутагдалтай. 

Барьцалдуулагчийн шинжилгээ 2019-2024 онд ШУА-ийн Хими, химийн технологийн хүрээлэнд олон удаа хийгдсэн ч хортой бодис илрээгүй. Тавантолгой түлш компанийн баримталж буй барьцалдуулагчийн стандарт нь хэт ерөнхий, эрдэс бүрэлдэхүүний найрлагыг тодорхой заагаагүй учир чанарыг нь үнэлэхэд хүндрэлтэй байна гэв.