2019 оны долдугаар сарын 3-нд Засгийн газрын 280-р тогтоол гарч, "Чингис хаан, хаад язгууртны музей"-г байгуулах шийдвэр гарсан. Музейг барих ажил гурван жил үргэлжилж дуусжээ.

Өнөөдөөр морин цагт буюу 11.40-д музейн нээлт эхэлнэ. Нээлтийн үеэр Төрийн есөн хөлт цагаан тугийг Төрийн ордноос гарган, музейд залах Ерөнхийлөгчийн зарлиг гарчээ.

Энэ онд Чингис хааны мэндэлсний 860 жилийн ой тохиож байна.  Энэхүү тэгш ойд зориулж, төрөөс олон ажил зохион байгуулахын нэг нь музейн нээлт. Мөн тэгш ойн хүрээнд Их Эзэн Чингис хааны эш хөргийг төрийн байгууллагуудад залах ажлыг эхлүүллээ.

Чингис хаан, түүний залгамжлагчдын музейтэй болсноор бид түүхээ сурталчилж чадна.  Олон түмнийг соён гэгээрүүлэхийн зэрэгцээ аялал жуулчлалд энэ музей чухал хувь нэмэр оруулах юм.

Нээлтэд оролцохоор Сүмо бөхийн их аварга Хакүхо Даваажаргал, Хамба лам Д.Чойжамц, ардын уран зохиолч Пунцагийн Бадарч, МҮОНРТ-ийн нэвтрүүлэгч Ш.Ёолк, ардын жүжигчин П.Цэрэндагва, ардын жүжигчин Д.Мэндбаяр, ардын жүжигчин Д.Ухнаа, алдарт бөхчүүд, Соёлын сайд Ч.Номин, Ерөнхийлөгчийн Тамгын газрын дарга Я.Содбаатар, Ерөнхийлөгчийн зөвлөхүүд, манай улсад суугаа элчин сайдууд, Ерөнхийлөгч асан Н.Энхбаяр нар хүрэлцэн иржээ.        

Гэрэл зургийг А.Эрхэмбаяр