Өнөөдөр буюу зургаадугаар сарын 30-нд Ардчилсан намын дарга С.Эрдэнэ, ЕНБД Ч.Өнөрбаяр, дэд дарга Ц.Оюундарь нар Ардчилсан намын XIV их хурал, УИХ-ын гишүүн О.Цогтгэрэлийн УИХ дахь АН-ын бүлэгтэй холбоотой өргөн барьсан хууль болон Үндсэн хуульд оруулах нэмэлт өөрчлөлтийн талаар мэдээлэл хийж байна.

Ерөнхий нарийн бичгийн дарга Ч.Өнөрбаяр: УИХ-ын гишүүд, эрх баригчид уг нь үнийн өсөлттэй тэмцэх ёстой. Гэтэл үүний оронд Үндсэн хуультайгаа тэмцэж байна. Эдийн засгийн муу үзүүлэлт, үнийн өсөлт, иргэдийн цалин орлого буурч байгаа нь Үндсэн хуультай холбоотой гэж үзэж байна. Бүх зүйлд Үндсэн хуулийг буруутгаж байна. Гэтэл яг ийм үндэслэлээр 2019 онд гар хүрсэн. Тухайн үед УИХ-ын дарга Г.Занданшатар гардаж өөрчлөлт хийж байсан. Тэгвэл батлуулсан Үндсэн хуулийнхаа нэмэлт өөрчлөлтийг хамгаалах цаг нь ирсэн. Хариуцлагыг Үндсэн хуулиасаа биш өөрсдөөсөө нэхье.

Халуун зунаар Монгол Улс хариуцлагын зуданд орчихлоо. Өнөөдөр УИХ Үндсэн хуулиа манаж чадахгүй байна. Үнэнч биш байна. Үүний оронд хариуцлага алдсан албан тушаалтнуудад хариуцлага тооцох хууль батлах хэрэгтэй. Ардчилсан Үндсэн хуулиас урваж буй УИХ-ын даргыг огцруулах хэрэгтэй. Г.Занданшатар дарга аа, Үндсэн хуулиа мана. Манаж чадахгүй бол огцор.

Мөн үнийг тогтворжуулах асуудлаар яагаад дорвитой арга хэмжээ авахгүй байна вэ. Наймдугаар сард иргэдийг амралт зугаалгаар явах хойгуур эрчим хүчний үнээ нэмэх гэж байна. Олон улсын санхүүгийн байгууллагууд Монгол Улсын гадаад өрийг 90 гаруй хувьтай болсон гэсэн. Иргэдийн орлого биш өр нь нэмэгдээд байна.