Өмнөговь аймгийн Даланзадгад хотын хүүхэд, залуус “Open mic”-д оролцохоор гадаа талбайд цуглажээ. Үсээ буржийлгаж, нүүрэндээ хөнгөн энгэсэг түрхэж нүдэндээ саа гялалзуулсан ганган охид, гутлаа гялтайлгаж, хувцсаа цэмцийлгэсэн хөвгүүд олон харагдана. Тэд долоо хоног бүрийн бямба гарагт зохион байгуулдаг “Open mic”, “Cover night”-ийг хоног тоолон хүлээдэг аж.

18:00-21:00 цаг хүртэл үргэлжлэх “Open mic”-д “Эрхүүгийн хавар”, “Нандин хүсэл”, “Гоё тэ” зэрэг олон дуу эгшиглэнэ. Тэд тайзнаа гарсан хэнийг ч алга ташиж баяр хүргэлгүйгээр буулгахгүй. Биедээ урам өгч хөглөхийг хамгийн сайн мэддэг гэлтэй дуугаа алдсан ч, үгээ мартсан ч урамшуулан алга ташна.  

ӨНӨӨДӨР ЭНД ГАНЦХАН ХҮНИЙГ ИРЭЭСЭЙ ГЭЖ ХҮССЭН...

Тайзан дээрээс нэгэн хөвгүүн “Өнөөдөр энд ганцхан хүнийг ирээсэй гэж хүссэн. Тэр ирсэн байна. Түүнд зориулав” гээд дуугаа эхлэв. Охид хөвгүүдгүй ийш тийшээ харц гүйлгэн хэнд зориулсныг нь хайна. Тэр дууны эзэн охин сэтгэл нь догдолж, ичингүйрч зогссон нь лавтай. Сэтгэлээ илчилсэн, нэгнээ дэмжсэн, найзуудтайгаа хөгжмийн хэмнэлд хөгжилдөх орчин энд бүрджээ.

Тэд зориулалтын тайзгүй ч гадаах талбайдаа чанга яригчаа, микрофонтойгоо авчраад л үйл ажиллагаагаа зохион байгуулчихна. Хааяа микрофон нь паржигнан гацах ч хэн ч асуудал гэж үзэхгүй, үргэлжлүүлэн дуулцгаана. Гитар тоглодог залуус ямар олон юм бэ хэмээн уулга алдмаар. Залуус гитарыг ёстой “уйлуулах” шиг болж байв.

ГАДАА НАР БУУЖ, СЭРҮҮ ОРОВЧ ТЭДНИЙ УУР АМЬСГАЛ ХАЛУУН ХЭВЭЭРЭЭ ҮРГЭЛЖИЛНЭ

Энэ л өдрийг зорьж очиж, харж явдаг охин, хөвгүүнээ харах гэж догдолдог тухай зарим нь буу хална. Хоёр, гурваараа хөтлөлцсөн охид харагдана. Нэгнийхээ зургийг дарж, краш нь хажуугаар нь өнгөрсөн үү гэлтэй нэгнийгээ цаашлуулж инээлдэх нь өхөөрдөм.

“Алга ташвал эд эс сэргэнэ шүү” хэмээн хөтлөгч хэлж, үзэгч хүүхэд залуус цөмөөрөө алга ташна. Баярласан, хөгжилдсөн хөөрхөн гэдэг үгээр илэрхийлэхэд багадмаар тийм дүр зураг.

Тэд гадаа зохион байгуулж буй үйл ажиллагааныхаа үеэр хог хаягдал огт гаргадаггүй. Мөн байгальд ээлтэй байхаар олон хүн цугласан дээр батарей цуглуулж буй тухай Өмнөговь аймгийн Улсын тэргүүний Лаборатори 1-р сургуулийн 11б ангийн сурагч Т.Ариунзаяа хэлсэн юм.

Гадаа нар бууж, сэрүү оровч тэдний уур амьсгал халуун хэвээрээ үргэлжилнэ. Маргааш буюу бямба гарагт тэд яг товлосон цагтаа уулзана. “Open mic”, “Cover night”-ийн үеэр хэн хэнд зориулж дуулах бол, тэр ирэх болов уу гэх догдлол дүүрэн залуус гадаах талбайдаа дахин цуглана...