“Тамхины хяналтын тухай хуулийн хэрэгжилт, тулгамдаж буй асуудал” сэдэвт хэлэлцүүлэг, зөвлөгөөнийг энэ сарын 27, 28-ны өдрүүдэд зохион байгуулж байна.

Хорт хавдрын шалтгааны 30 хувийг тамхидалт эзэлж байна гэдгийг Эрүүл мэндийн сайд Т.Мөнхсайхан хэлсэн.
Тэрбээр Хэлэлцүүлэг хийгээд орхих биш, үе шаттай арга хэмжээнүүдийг авч, хуулийн шинэчилсэн найруулгыг ойрын хугацаанд өргөн барих хэрэгтэй гэв.

Хэлэлцэж буй асуудалтай холбоотойгоор Г.Лувсанжамц гишүүн санал хэлсэн юм. 

Тэрбээр Манай улс зорилтот татварын тогтолцоо руу шилжихгүй байна. Тухайлбал Авто зам ашигласны төлбөр хүүхдийн хөгжлийн сан руу явдаг. Ийм уялдаагүй тогтолцоотой. Татвар нь тэр асуудлаа шийдэхэд зориулагдах ёстой. 

Жишээ нь тамхины татварыг ногоон байгууламж байгуулах, спорт цогцолборыг бий болгох зэргээр хүүхэд залуусын хөгжиж болох зүйлсэд зарцуулах ёстой. Татвар нь тухайн асуудлаа шийдэхэд зориулагдах ёстой. 

Бидний үед чөлөөт цагаараа хийх зүйл хомс байсан. ПС, тамхинд л цагаа зарцуулдаг байлаа. Одоо харин ч ПС нь хөгжөөд спортын түвшинд очоод байна гэсэн юм.

Хэлэлцүүлгийн үеэр дурдагдсан саналууд: 

Электрон тамхийг зөвхөн сургуулийн орчинд бус нэгдсэн байдлаар хориглох. Одоогийн байдлаар сургуулийн орчинд вэйп буюу электрон тамхийг хориглох шийдвэр гарч, хэрэгжүүлж буй. Гэсэн ч бодит байдал дээр хүүхдүүд хэрэглэсээр байдаг. Зарим эцэг эх "хүүхдийн эрх" гэсэн шалтгаанаар өөрсдөө авч өгөх ч тохиолдол гардаг. Ингэхээр хориглосон шийдвэр, хяналтын ажиллагаа үр дүнгүй болж байна. Иймд нэгдсэн байдлаар хориглох саналыг дэвшүүлэв. 

Тамхины татвараас эрүүл мэндийн салбарт орох хувийг нэмэгдүүлэх. Одоогоор тамхины татварын хоёр хувь нь эрүүл мэндийн салбар руу явдаг гэдгийг салбарын сайдын зөвлөх хэлсэн. Үүнийг таван хувь болгож нэмэгдүүлбэл залуучуудад чиглэсэн илүү олон зүйл хийх боломжтой гэсэн юм.