Нэг гэр бүлийн 6 хүн гэртээ угаартаж нас барсан, тэдний эмзэг мэдээлэл олон нийтэд ил болсонтой холбогдуулан Засгийн газар хариуцлага хүлээх ёстой гэдэг шүүмжлэл өрнөж байна.

УИХ-ын гишүүн Ч.Лодойсамбуу “Ерөнхий сайдыг огцруулах санал гаргах тухай албан бичгээ боловсруулж байна. Албажуулахаас өмнө Ерөнхий сайдыг өөрөө улсын Ерөнхий сайд хүн шиг мэдэгдэл хийхийг хүлээж байна.

Дөрвөн жил Ерөнхий сайд хийхдээ энэ олон хүний амийг авраагүйдээ уучлал хүсээд өөрийн хүсэлтээр ажлаа өгөх мэдэгдэл хийгээд мэхийн ёслох ёстой. Улсын Ерөнхий сайдын хувиар, хүний ёсоор” гэж цахим хуудсандаа бичжээ.

Энэ тухай тэрбээр сэтгүүлчдэд мэдээлэл өгч байна.

УИХ-ын гишүүн Ч.Лодойсамбуу:

-Ерөнхий сайдыг огцруулах тухай саналыг УИХ-ын дарга Д.Амарбаясгаланд хандан гаргалаа. Миний бие болон бусад гишүүдийн хамт дараах үндэслэлээр:

• Хүний эрх, эрх чөлөө алдагдсан,
• Өвлийн морин уралдааныг хориглосон Дээд шүүхийн шийдвэрийг үгүйсгэсэн,
• Амь насаа алдсан иргэдийн нэр төрийг зохион байгуулалттайгаар гутаан доромжилж, үзэл бодлоо илэрхийлсэн иргэдийг бусдын нэр төрд халдсан зэргээр хязгаарлах байдал даамжирсан,
• Шүүхээр тодорхой шийдвэр гаргуулах зорилгоор шүүхийн бие даасан байдалд удаа дараа халдаж, шүүхэд итгэх олон нийтийн итгэлийг удаа дараа алдагдуулсан,
• Эдийн засгийн бодлого алдагдаж, чөлөөт зах зээлийг боомилж байна,
• Хэт үрэлгэн төсөв нь үнийн өсөлтийг гааруулж, ядуурлыг бууруулах боломжгүй болголоо,
• Татварын бодлого оновчгүй, улмаар татвар төлдөггүй хэсэг хождог тогтолцоо бий болсон.

Тиймээс ардчилсан тогтолцоог хамгаалж, нийгмийн тогтворгүй байдал үүсэхээс сэргийлэхийн тулд Ерөнхий сайд Л.Оюун-Эрдэнийг нэн яаралтай огцруулах үндэслэлтэй гэж үзэж байна.

Гишүүд маань нам харгалзахгүйгээр Монголын ардчилал, Монголын хамгийн үнэт зүйлийн төлөө нэгдэнэ гэж итгэж байна, нэгдээсэй гэж уриалж байна. Ж.Баярмаа гишүүн нэгдэхээ илэрхийлсэн, ингээд хоёр УИХ-ын гишүүн боллоо” гэв.

Мөн тэрбээр "Ерөнхий сайд юу ч хийж болно гэж тооцож байгаа. Гэхдээ энэ боломжгүйг тэр залуу нэг бүтэн ном уншсан бол мэдэж байх ёстой. Жагсаж болохгүй, утсаар ярьж болохгүй, хүнтэй уулзаж болохгүй, тийм л нөхцөл бүрдчихсэн байна. Би сэтгүүлч байхдаа Ерөнхий сайд Л.Оюун-Эрдэнийн дарамтад янз, янзаар өртөж байсан гэдгийг хэлэв.