МУИС-ийн хичээлийн гуравдугаар байрны барилгын ажлыг эхлүүллээ.

МУИС-ийн хичээлийн III байрны хуучин барилга 1956 онд ашиглалтад орсон, 6953 м2 талбайтай (1999 онд ашиглалтад орсон өргөтгөлийн хамт) 3 давхар Г хэлбэрийн барилга юм. Хийц бүтээцийн хувьд чулуун дүүргэгчтэй шугаман суурьтай, тоосгон ханатай, төмөр бетон, модон хучилт хосолсон, шувуу нуруу бүхий төмөр дээвэртэй, хучлага төмөр урагдаж зэвэрсэн, ашиглагдсан цагаас их засвар хийгдээгүй, хана нь хагаралт, цууралт ихтэй, барилгын бүтээцүүд нь өгөршиж муудсан, цахилгааны утсанд богино холболт үүсдэг байжээ.

Барилгын техникийн хяналтын улсын байцаагч  шалгалт явуулж, 2022.02.09-нд уг барилга  нь цаашид ашиглалтын шаардлага хангахгүй, бат бэхийн хувьд 8 баллын газар хөдлөлийг тэсвэрлэх чадваргүй болохыг нь тогтоосон дүгнэлтийг гаргасан байна.

Төрийн өмчийн хорооны бодлого зохицуулалтын газрын “Үндсэн хөрөнгө акталж, данснаас хасах зөвшөөрөл олгох тухай” хичээлийн хуучин 3-р байрны тухай  шийдвэр 2023.05.02-нд гарчээ. Улмаар хичээлийн анги, танхимуудыг чөлөөлөн, тус байранд байрлаж байсан бүрэлдэхүүн сургуулиудыг өөр байранд нүүлгэн шилжүүлжээ.

Мөн ондоо Боловсролын ерөнхий газраас барилгын ажлыг гүйцэтгэх гүйцэтгэгчийг сонгон шалгаруулж, буулгалтын ажлыг зураг төслийн дагуу гүйцэтгүүлсэн гэж тус сургуулийн удирдлагууд хэлэв .

Шинээр барих хичээлийн 3-р байрны барилга нь А, Б хоёр блокоос бүрдэнэ гэж МУИС-ийн Санхүү, эдийн засгийн бодлогын газар мэдээлэв.

Гэрэл зургуудыг Т.Бархас