33 намартай золгож буй Монголын театрын музейн хаалгаар ороход л үе үеийн уран бүтээлчдийн арвин их бүтээлийг өлгийдсөн гэлтэй дүнхийнэ.

Энэ удаа Өмнөд Солонгосын 40 орчим мэргэжлийн гэрэл зурагчид хамтарсан “Улаанбаатар хотын тусгай” гэрэл зургийн тусгай үзэсгэлэнг дэлгэжээ. Монголын ахуйн соёл, байгаль дэлхий, гоо сайхан, хүүхдийн ертөнц зэрэг олон өнцгийг харуулсан 150 гаруй гэрэл зургийг багтаж буйгаараа онцлог байна.

Танхимд дахь үзэгчдийн ихэнх нь аялагчид байв. Тэдний сэтгэгдлийг сонслоо.

Япон аялагч Канагава Мэй “Би Японы үндэсний театрт ажилладаг. Тиймээс ч Монголд аялахаар ирээд энэ улсын театрын музейг сонирхмоор санагдсан.

Энд олон төрлийн өвөрмөц урлагийн бүтээлүүд хадгалагддаг юм байна. Мөн Солонгосын гэрэл зурагчдын тусгай үзэсгэлэн өндөр сэтгэгдэл төрүүллээ. Учир нь Монгол дэлгүүрүүдэд маш олон төрлийн Солонгос бүтээгдэхүүн борлуулдаг юм билээ. Тиймээс ч хоёр улсыг эв найрамдал сайтай гэж бодсон.

Солонгос зурагчдын дуранд Монголын ахуй соёлыг жуулчны нүдээр буулгаж, дэлгэн харуулжээ. Энэ нь нүүдлийн болон суурин амьдралын хэв маягийг төлөөлж буй мэт санагдлаа.

Гэхдээ Монголчууд гэрэл зургийн үзэсгэлэнг тийм ч их үздэггүй бололтой” гэв.

Тусгай үзэсгэлэнг үзсэнээр солонгос зурагчид манай орны ахуй, соёлоос юуг нь онцгойлон дурандаа буулгасныг, тэдний мэдрэмж хэрхэн хөглөгдсөнийг харах боломжтой. Үзэсгэлэн энэ сарын 20-25-ны өдрүүдэд Монголын театрын музейд үргэлжилнэ.

ФОТО:

М.Лхагвадулам