-Ялгаатай гэх утгыг яг ижилхэн хэмээн солих нь-

Playtime гэж юу вэ? Мэдрэмж, ойлголцол, соёл, хөгжмийн ертөнцийн хөг хэмнэл, эрчим, чөлөөт сэтгэлгээ, байгаагаараа байж болох орон зай. Магадгүй хүн бүр энэ асуултад өөр өөрийн гэсэн хариултыг өгөх байх.

Playtime зөвхөн “хөгжмийн наадам” гэх хоёр үгээр тодорхойлогдохоос хальчихсан утгыг тээх аж. Энэ жил 20 насанд хүрч буй Playtime-ийн алсын хараа Ази даа шилдэгт багтах, дэлхийн хөгжмийн урлагаас монголчууд хоцроогүйг батлах. Энэ жилийн Playtime дөрвөн өдөр үргэлжилснээр өнөөдөр хаалтаа хийж байна.

Зуныг Playtime-гүйгээр төсөөлөхийг хүсдэггүй залуус, цар тахлын дараа ийн хамтдаа цуглаж “Монгол шилтгээн”-ийг доргиов. Үүд рүү нь дөхөхөөс эхлээд хараа, сэтгэл булаах зүйлс олон аж.

Тэнд энгийн үед гудамжинд өмсөхөөс зориг дутдаг этгээд хувцсаараа гоёсон залуус өөртөө итгэлтэй алхана. Хэн ч нэгнийгээ өөлөхгүй, шоолохгүй. Ялгаатай байдал гэх утгыг яг ижилхэн хэмээх агуулгаар сольчихсон мэт.

Толгойгоос хөлийн ул хүртэл өөр хэв маяг, донж цогцлоосон хүмүүс зөрөх нь соёлын солилцоог нүдээр харах шиг сонирхолтой. Зөвхөн Playtime-д өмсөхөөр өөртөө зориулж урласан хувцсаа өмссөн хэмээх залуустай та цөөнгүй таарна.

Playtime наадмыг залуусынх хэмээн тодотгох нь учир дутагдалтай гэмээр. Хүүхдүүдээ дагуулж ирсэн аав, ээжүүд, найз нөхөд, хосууд, ганцаархнаа зорьж ирсэн нэгэн, “Pink Floyd” гэх бичигтэй фудболк өмсөөд доргих өвөөтэй та тэнд таарна.   

Уул, ус, агаар, тэнгэр, од, салхи, бороо. Байгальд байх нь уур амьсгалыг улам чөлөөтэй болгох аж. Зүлгэн дээр суугаад зүгээр л эморох боломж ч энд бий. Нэгнээсээ суралцах, өөрийнхөө сонирхлыг хөглөх, хөгжмөөр сэтгэлээ дулаацуулах, хожим санагалзах дурсамжийг энд бүтээх аж.

Тайзаа санасан уран бүтээлчид, амьд хөгжмийн хэмнэлийг хүссэн үзэгч сонсогчдын үелзэл Playtime-ийн үеэр огтолцох шиг. Энэ жилийн наадамд 15 тайзнаа 150 гаруй хамтлаг, дуучин, уран бүтээлчид үе үеийн хэлхээг харуулах шиг хөг, хэмнэл, мэдрэмжийг түгээв.