Чуулганаар Монголбанкны Мөнгөний бодлогын хорооны зарим гишүүн, Хяналтын зөвлөлийн дарга, гишүүнийг томилох, чөлөөлөх тухай асуудлаар хэлэлцэж байна. 

УИХ-ын гишүүн Х.Ганхуяг “Даваадорж нэр дэвшигчид хандаж үг хэлмээр байна. Та бол УИХ-ын дэд даргын ахлах зөвлөх. Та Монгол банканд аль нэг намын улс төрийг хэрэгжүүлж болохгүй шүү гэдгийг хэлмээр байна. Олон улсын судалгаанд "Зомби" ААН-үүд гэж нэр томьёо бий. Энэ нь хүүгийн татаасаар санхүүждэг байгууллагуудыг хэлдэг.

"Зомби" байгууллагууд бага хүүтэй зээлээр оршин тогтнож байна. Манай улсын бүх салбарт үйл ажиллагаа явуулж буй компаниудад хөнгөлөлттэй зээл олгочихсон. Үүний үр дүнд өрсөлдөх чадваргүй компаниудтай болцгоодог. Бүх ажлын хэсэгт Монгол банкнаас хүн ордог. Энэ асуудалд анхаарах шаардлагатай.

Түүнчлэн ипотекийн зээл олдохоо байсан. Орон сууцны үнэ ч талийгаад алга болсон. Энэ зээлээ бодлогын хүүтэй уялдуулах хэрэгтэй. Энэ асуудалд онцгой анхаарч ажилламаар байгаа юм" гэлээ.  

Нэр дэвшигч Р.Даваадорж “Би энэ парламентын хугацаанд судалгаандаа анхаарч ажиллаж байгаа. Тиймээс ямар нэгэн улс төржилт байхгүй байна гэдгийг хэлье. Цар тахлын нөлөөгөөр дэлхийн хэмжээнд хөнгөлөлттэй зээлүүд маш ихээр олгогдсон. 2022 оны сүүлээр Массачусетсийн эрдэмтдийн судалгаагаар асар их хэмжээний зомби компаниуд бий болсон гэж гаргасан. Энэ талын судалгаа Монголд байхгүй. Тиймээс Монгол банкны судалгаа зарим холбогдох байгууллагуудтай хамтран судлах хэрэгтэй. Ипотекийн зээлийн хувьд Засгийн газар, Монгол банкны асуудал байх уу гэдгийг сүүлийн 4 жилд маргалдаж байна.Энэ асуудалд анхаарч ажиллана" гэлээ.