УИХ-ын өнөөдрийн хуралдаан үргэлжилж байна. Ерөнхийлөгчийн санаачлан боловсруулсан “Малын гаралтай түүхий эдийн боловсруулах үйлдвэрлэлийг дэмжих зарим арга хэмжээний тухай” УИХ-ын тогтоолын төслийг тавдугаар сарын 27-ны өдөр Их Хурлын дарга Г.Занданшатарт өргөн барьсан.

Өнөөдөр УИХ-ын чуулганы хуралдаанаар энэхүү тогтоолын төслийн анхны хэлэлцүүлгийг хийж байна. Хэлэлцэж буй асуудалтай холбогдуулан УИХ-ын гишүүд асуулт асууж, үг хэлж байна.

УИХ-ын гишүүн О.Цогтгэрэл:

-Ерөнхийлөгчөөс мал аж ахуйн бүтээгдэхүүнийг боловсруулахыг дэмжих тухай баримт, бичиг орж ирснийг дэмжиж байгаа. Гэхдээ нэг сонирхолтой зүйл харагдаад байна. Ийм агуулга бүхий баримт бичиг удаа дараа орж ирж байна. Сонгууль боллоо. Чуулган өнөөдөр хаана. Малчидтай холбоотой баахан л  хууль, тогтоол баталж байгаа. Бодлого, хөтөлбөр цаасан дээр бичсэнээр биш малчид, бизнес эрхлэгчдэд ямар үр дүн очив гэдэг л чухал.

Найман жилийн дараа эргээд харахад арьс ширний боловсруулалт хаачсан бэ, энд тэнд барина гэсэн үйлдвэр, паркууд хаана вэ, цаасан дээр л үлдсэн байна.

УИХ-ын гишүүн С.Бямбацогт:

“Цагаан алт” үндэсний хөтөлбөрийг дэмжиж байна. Малчдын орлогыг нэмэгдүүлмээр байгаа. Бид малчдыг халамжилдаг, хайрладаг, орлогыг нь нэмэгдүүлэхэд анхаарахгүй явж ирсэн. Малчдын орлогыг нэмэх малынх нь арьс шир, ноос ноолуур, гэдэс, гүзээ, цус сэвс үнэ цэнтэй болчихвол малчид төр засгаас юм нэхээд, хараад байхгүй.

Санал хураалтаар гишүүдийн олонх дэмжсэн тул “Малын гаралтай түүхий эдийн боловсруулах үйлдвэрлэлийг дэмжих зарим арга хэмжээний тухай” тогтоолын төслийг эцсийн хэлэлцүүлэгт бэлтгүүлэхээр Үйлдвэржилтийн бодлогын байнгын хороонд шилжүүллээ.

“Цагаан алт” үндэсний хөтөлбөрийн хүрээнд:

• Ноолуурын бүрэн боловсруулалтын түвшнийг 20 хувиас 40 хувь хүртэл нэмэгдүүлж, үйлдвэрлэлийг 1,5 их наяд төгрөгөөс 2,3 их наяд төгрөг, экспортыг 398 сая ам.доллароос 690 сая ам.доллар хүртэл нэмэгдүүлж, шинээр гурван мянга гаруй ажлын байр бий болно,
• Ноосны боловсруулалтын түвшнийг 25 хувиас 55 хувь хүртэл нэмэгдүүлж, үйлдвэрлэлийг 240 тэрбум төгрөгөөс 670 тэрбум төгрөг, экспортыг 52 сая ам.доллароос 119 сая ам.доллар хүртэл нэмэгдүүлж, шинээр 2,200 орчим ажлын байр бий болно,
• Арьс, ширний боловсруулалтын түвшнийг 30 хувиас 50 хувь хүртэл нэмэгдүүлж, борлуулалтыг 57,8 тэрбум төгрөгөөс 900 тэрбум төгрөг, экспортыг 9,6 сая ам.доллароос 22,4 сая ам.доллар хүртэл нэмэгдүүлж, шинээр гурван мянга гаруй ажлын байр бий болно гэж тооцоолж байна.
• “Цагаан алт” үндэсний хөтөлбөрийн нийт төсөв 2.19 их наяд төгрөг бөгөөд үүнээс 682.4 тэрбум төгрөгийг улсын төсвөөс санхүүжүүлэхээр төлөвлөсөн. Арилжааны банкууд үйлдвэр, аж ахуйн нэгжүүдэд 1,51 их наяд төгрөгийн зээл олгох юм байна.