Улсын ерөнхий прокурорын газраас 2022 онд хүний эрх зөрчигдсөн асуудлаар болон хүний эрхийг сэргээх, байгууллагын үйлчилгээг иргэдэд хүргэх чиглэлээр хийсэн ажлаа танилцуулж байна.

Мөн Нийслэлийн прокурорын газраас хяналт тавьсан зарим гэмт хэргийн шийдвэрлэлт, явцын талаар мэдээллээ.

БИЧЛЭГ:

/Бичлэгийг тоглуулж болохгүй бол ЭНД дарна уу/

-УЕПГ-ын Зөрчлийн хэрэг бүртгэх ажиллагаанд хяналт тавих хэлтсийн хяналтын прокурор Ч.Батбаяр:
-2022 онд 2390 зөрчлийн талаарх гомдол мэдээлэл хүлээн авсан. Зөрчил үйлдэгдсэн газрыг судалж үзвэл 58 хувь нь нийслэлд байна. Хялбаршуулсан журмаар 141700 гомдол мэдээллийг хялбаршуулсан шугамаар шийдвэрлэсэн.

Эрх бүхий байгууллагад нийт 470 удаа шалгалт хийсэн.

Хүний толгой дээр кофе асгасан Б.Ариунзаяатай холбогдох хэргийн талаар тодруулахад “Зөрчил шалган шийдвэрлэх ажиллагаа явуулж, Эрүүгийн гэмт хэргийн шинжтэй байна хэмээн үзсэн.

Хэрэг Нийслэлийн Эрүүгийн хэргийн давж заалдах шатны шүүхэд очсон” хэмээлээ.  

-УЕПГ-ын Хэрэг бүртгэх, мөрдөн байцаах ажиллагаанд хяналт тавих хэлтсийн хяналтын прокурор Б.Долгион:
-2022 онд Прокурорын байгууллагаас хүний эрхийг хамгаалахад чиглэн зорьж ажилласан. Үүнд, Шүүхийн зөвшөөрөлтэй болон зөвшөөрөлгүй баривчлах ажиллагаанд хоёр удаагийн мониторинг судалгаа хийж, харьяа байгууллагыг мэдээллээр хангасан.

Өнгөрсөн онд УЕПГ-аас бэлгийн халдашгүй байдлын улмаас хохирсон хүний 56 хувь нь 16 насанд хүрээгүй байна.

Энэ судалгааны дүн анхаарал татсан. Гэмт хэрэг үйлдэгсдийн 85 хувь нь төрөл садных байсан.
Энэ төрлийн гэмт хэргээс зайлшгүй урьдчилан сэргийлж ажиллах ёстой.

УЕПГ-аас кибер гэмт хэргийн гаралтыг гурван жилийн хугацаанд судалсан. Цахим хэрэгсэл ашиглаж үйлдсэн 5371 хэрэгт хэрэг бүртгэлт нээсэн. Тиймээс иргэдийг цахим мэдээлэлд шүүлтүүртэй хандахыг уриалж байна.

Нийт 822 хүнд хилийн хориг тавьсан.

-УЕПГ-ын Ял эдлүүлэх ажиллагаанд хяналт тавих хэлтсийн ахлах прокурор У.Золжаргал:
-Шалгах, танилцах ажиллагааг тогтмол хийж байна. Цагдаагийн байгууллага хүний эрхийг зөрчиж буй эсэхэд шалгах ажиллагаа явуулж байна.

Хорихоос өөр төрлийн ялаа биелүүлээгүй тохиолдолд прокуророос ялыг солиулдаг. 424 хүний хэргийг шүүхээр шийдвэрлүүлсэн.

Сүүлийн хагас жилд гадаад улсад ял эдэлж буй нэг монгол иргэнийг, өнгөрсөн жилд нийт дөрвөн иргэнийг эх оронд нь авчирсан.

Нийслэлийн прокурорын газрын Хэрэг бүртгэх, мөрдөн байцаах ажиллагаанд хяналт тавих 1 дүгээр хэлтсийн дарга Б.Мөнх-Од шүүхэд шилжүүлсэн зарим хэргийн талаар мэдээлэл өглөө.

• Нийслэлийн нийтлэг үйлчилгээний газрын дарга О нь албан тушаалаа урвуулан ашиглаж, өөртөө болон бусдад давуу байдал олгосон.
• АТҮТ-ийн Тээврийн хэрэгслийн бүртгэл, техник, хяналт мэдээллийн технологи хариуцсан дэд захирал Б албан тушаалаа урвуулан ашиглаж ААН компанид давуу байдал үзүүлсэн.
• “Эрдэнэт” үйлдвэрийн орлогч захирал Г албан тушаалын байдалтайгаа холбогдуулан ОХУ-ын иргэнээс хахууль авсан. Мөн гэмт хэргийн улмаас бий болсон хөрөнгийг нуун далдлах зорилгоор авч мөнгө мөнгө угаасан гэх хэрэг.
• Хотын стандарт, орчны аюулгүй байдлын хянан шалгалт зохицуулалтын газрын Барилга байгууламжийн хэлтсийн дарга Ж албан тушаалын байдалтай холбогдуулан бусдаас хахууль авсан.
• АТҮТ-ийн Хөдөлгөөний хэлтсийн албан тушаалтан М эрх мэдэл, албан тушаалаа урвуулан ашиглаж ААН компаниудад давуу байдал олгосон.
• “ЗЧМ” компанийн захирал Б бодит байдлыг нуух замаар бусдыг төөрөгдүүлж оруулж 19 сая ам.долларыг залилсан гэх хэрэг.
• Улсын их дэлгүүрийн 6 давхрын засварыг хийж гүйцэтгэх явцдаа хууль тогтоомж зааврыг зөрчиж, болгоомжгүй үйлдэл гаргаснаар тус дэлгүүрийн дээвэр шатсан гэх хэрэг.
• ОХУ-ын иргэн Д.В Монгол Улсын иргэн Г-г толгойн тус газар нь алхаар цохиж, амь насыг нь онц хэрцгийгээр алсан гэх хэрэг,
• Хөвсгөл аймгийн засаг даргаар ажиллаж байсан Ганболд албан тушаалын байдалтай холбогдуулан хахууль авсан хэрэг,
• АТҮТ-ийн Төрийн өмчит үйлдвэрийн газрын Дорноговь аймаг дахь салбарын даргаар ажиллаж байсан Х албан тушаалаа урвуулан ашиглаж хахууль авсан,
• “Капитал” банкны төлөөлөн удирдах зөвлөлийн дарга А бусадтай бүлэглэн иргэд, ААН-ийн хадгалах болон хадгаламжийн дансанд байршуулсан мөнгөн хөрөнгийг хууль бусаар зарцуулсан. Тус банкийг төлбөрийн чадамжгүй болгож, их хэмжээний хохирол учруулсан гэх хэргийг Нийслэлийн прокурорын газраас яллах дүгнэлт үйлдэж, шүүхэд шилжүүлсэн байна.