Нийслэлийн нийтийн тээврийн парк шинэчлэлийн хүрээнд автобус худалдан авах ажиллагааг Хянан шалгах түр хорооны нотлох баримтыг шинжлэн судлах сонсгол эхэллээ.

Энэ үеэр УИХ-ын гишүүн Д.Батлут “Яагаад ногоон автобусны худалдан авалтын үйл ажиллагааг зохион байгуулахдаа төрийн нууцын зэрэглэлд оруулсан бэ гэдийг Нийслэлийн Засаг дарга асан Д.Сумьяабазараас асуумаар байна. Ер нь төрийн нууцын зэрэглэлд оруулчихаар асуудал үүсдэг шүү дээ. Мөн Евро 5 автобус худалдан авах гэж байгаад Евро 4 болгох гэсэн байна. Үүнийг тайлбарлаж өгнө үү” гэв.

Улаанбаатар хотын замын түгжрэлийг бууруулах үндэсний хорооны дарга, Монгол Улсын сайд асан  Ж.Сүхбаатар “Би хотын замын түгжрэлийг бууруулах үндэсний хорооны дарга болсноос нийтийн тээврийн сайд болоогүй. Засгийн газрын гишүүнээр томилогдсоны дараа түгжрэлийг бууруулах үр дүнтэй бодлого гаргах даалгавар өгсөн. Үүний хүрээнд нэгдүгээрт нийтийн тээврийн асуудал байсан.  Би түгжрэлийн бууруулах сайд болчхоод автобустай орооцолдъё гэж бодоогүй. Гэхдээ нийслэлийн бүх автобус ашиглалтаас гарахаар болчихсон. Эхнээсээ шатаад эхэлчихсэн учир намайг цочирдуулсан.  Автобусыг нийслэлийн асуудал гэж орхичхож чадаагүй. Хоногт 500-600 мянган зорчигч хөдөлгөөнд оролцдог. Үйлчилгээнд явж буй нийтийн тээврүүд 2025 он гэхэд ашиглалтаас гарахаар байсан. Олон жилийн турш нийтийн тээврийг шинэчлээгүй учир энэ асуудал овоорчихсон байсан" гэв.

Нийслэлийн засаг даргын зөвлөх асан Д.Мөнх-Эрдэнэ “Шинжээчийн дүгнэлтэд ногоон автобусыг худалдан авах төрийн нууцад хамааруулсан гэдэг нь буруу. Автобус худалдан авахад төрийн нууцад хамааруулах ямар ч боломжгүй. Анхнаасаа буруу ташаа мэдээлэл тараагаад улс төрийн тоглолт  хийгээд байна. Үндэсний стандартаар 12 жил ашигласан нийтийн тээврийн үйлчилгээнд явуулахыг хориглодог. Энэ худалдан авах ажиллагаа үндэслэлгүйгээр явагдаагүй. Эхлээд Тагнуулын Ерөнхий газраас чиглэл өгсөн. Тиймээс автобус худалдан авах ажиллагаа иргэдийн эрүүл аюулгүй орчинд амьдрах эрх, үндэсний аюулгүй байдалтай холбоотой учраас хуулийн 3.4-т оруулах зүйтэй гэж үзсэн" гэв.