Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ойн Үндэсний их баяр наадмын хурдан шүдлэн насны хурдан морины уралдааны түрүү магнайд хурдалсан хар үрээг уяж, хурдлуулсан уяач Э.Улаанхүү цэнгэлдэхэд орж ирэхэд үзэгчид уухайлан угтлаа. 

Шүдлэнгийн уралдааны үеэр морь бариач хар үрээний урдуур орон шарга халзан үрээг барьсан бөгөөд шар үрээний уяач хүсэлт гаргаж, Хурдан морины салбар хорооны шийдвэрээр түрүү магнайг Дундговь аймгийн Луус сумын харьяат уяач Эрдэнээгийн Улаанхүүд өгсөн юм.

Тэрбээр төрийн наадамдаа анх удаа морь мордуулж, түрүүлүүлсэн гэдгээ хэлж байв. Хурдан морины уралдаанд түрүүлж, айрагдсан хурдан хүлгүүдийг Төв цэнгэлдэхэд ёслол төгөлдөр хүлээн авч, улсын наадмын шагналыг гардуулах үеэр үзэгчид түүнийг халуун алга ташилтаар угтаж, уяач баярын нулимс дуслуулсан сайхан үйл явдал боллоо.

Түүнээс сэтгэгдлийг нь сонссон юм.