Засгийн газрын ээлжит хуралдаан өнөөдөр боллоо. Хуралдаанаар:

• Технологи дамжуулах төв, эсхүл хамтын офист гишүүнчлэлээр бүртгүүлсэн гарааны компани болон программ хангамжийн үйлдвэрлэл, хөгжүүлэлтийн чиглэлээр үйл ажиллагаа явуулдаг аж ахуйн нэгжид дэмжлэг үзүүлэх журам,
• Хөрөнгө оруулалт, худалдааны газар байгуулах тухай,
• Судалгааны сан, түүний нэгдсэн систем бүрдүүлж буй ажлын явц,
• Олон улсын аялал жуулчлалын стратеги, төлөвлөлт зэрэг 17 асуудал хэлэлцэж, танилцав.

Эдийн засаг, хөгжлийн сайд Ч.Хүрэлбаатар:

-ҮСХ-ноос Монгол Улсын эдийн засаг 2022 онд 4.5 хувиар өссөн гэдэг сайн мэдээг ирүүллээ. Мөн Монгол Улсын валютын нөөц 3 тэрбум 560 сая ам.доллар буюу өнгөрсөн оны сүүл үеийнхээс сайжирсан дүнг Монгол банкнаас танилцуулсан.  Монгол Улсын гол экспортын бүтээгдэхүүн болох зэс, алт, нүүрсний үнэ сайн байгаа. Энэ бүгдээс үзэхэд эдийн засгийг тогтворжуулах зорилт амжилттай хэрэгжиж байна.

Засгийн газрын өнөөдрийн хуралдаанаар хөрөнгө оруулалт, худалдааны газар байгуулах шийдвэр гаргалаа. Энэ нь Монгол Улсад хөрөнгө оруулалт татах, сурталчлах, эдийн засгийг төрөлжүүлэх зэрэг асуудлыг шийдвэрлэж байх агентлаг юм.

Гадаадын хөрөнгө оруулалт төдийлөн нэмэгдэхгүй байсан. Рио Тинтогийн дараа Монгол Улсад хөрөнгө оруулахаар сонирхож ирсэн том компани бол Korea Telecom. Энэ компани манайд хөрөнгө оруулахаар судалгааны ажил хийж байгаа" гэв.

Ташрамд мэдээлэхэд БНСУ-ын харилцаа холбооны томоохон компани “Korea Telecom Corporation” Монгол Улсын Засгийн газартай хамтран ажиллах гэрээ байгуулсан. Ингэснээр  алт, зэс зэрэг 80 орчим төрлийн ашигт малтмалыг БНСУ-д нийлүүлэх чиглэлээр хамтран ажиллах аж. Үүнээс гадна БНСУ-ын “Korea Telecom Corporation” групп Монголд эрүүл мэндийн оношилгооны төв байгуулахаар судалж байгааг Засгийн газар мэдээлсэн.

УИХ-ын гишүүн Ц.Даваасүрэн:

Орхоны хөндийд Шинэ Хархорин хот байгуулах ажлыг эрчимжүүлэхээр хоёр шийдвэр гарлаа. Энэ ажлыг удирдах үндэсний хороо байгуулах шийдвэр гарч, би ахлахаар боллоо. Салбар хоорондын уялдааг  хангасан бүтцээр ажиллана. Шинэ Хархорум хотын бүтээн байгуулалтын захиргааг байгуулж байна.

Инженер, геодезын судалгаа  хийж, газрын бүтэц хөрсийг, ус цаг уурын нөлөөллийг судалж байна. Мөн газар хөдлөлтийн судалгааг хийж байгаа. Үүний дараа байршлыг тогтооно.

УИХ-аас саяхан 07 дугаар тогтоол гаргасан. Үүгээр гурван ажил хийнэ. Хотын ерөнхий төлөвлөлтийг хийнэ. Хөрөнгийн эх үүсвэрүүдийг бий болгох ажлыг зохион байгуулах юм.

Хархорум хотод Ерөнхийлөгчийн ордноос эхлээд төр захиргааны байгууллагууд байршина. Хотын төвлөрлийг сааруулахад энэ бүтээн байгуулалт чухал үүрэг гүйцэтгэнэ гэж төлөвлөж байна. Энэ хотыг 500 мянган хүнтэй байгуулна гэсэн төсөөлөлтэй байгаа юм билээ. Ерөнхий төлөвлөгөөний дараа энэ бүхэн тодорхой болно.