Тариа андуурч тарьсны улмаас хүн нас барсан хэргийн талаар хохирогчийн ар гэрээс мэдээлэл хийлээ.

Хохирогчийн эгч "Миний дүү бага ангийн багш байсан. Тухайн үед цар тахлын тархалт маш өндөр байлаа. Ковидын халдвар аваад "Өргөө" амаржих газарт хэвтсэн. Зүрхний цохилт унаад байна гээд эхний өдөр тариа хийгээд, биеийн байдал дээрдсэн. Гэтэл маргааш орой нь давтан хийхдээ сувилагч андуурч, зүрхний булчин сулладаг тариа хийчихсэн.

Тариаг дөнгөж шахаж эхлэхэд дүү маань "Эмч ээ" гэж хэлээд ухаан алдан унасан. Сэхээнд очоод хоёр хоноход эмнэлгийн удирдлагууд биднийг дуудаж буруу тариа хийснээ хэлээд "Найдваргүй шүү" гэж хэлсэн. Биеийн байдал нь дээрдэхгүй байсаар дүү маань 2021 оны есдүгээр сарын 28-нд бурхан болсон.

Эмнэлгийн удирдлага биднийг хоёр удаа хүлээн авч уулзаж, уучлалт гуйсан. Хуулийн байгууллага шийдэх учраас мэдүүлгээ өгөөд явж байна" гэв.

Уг хэрэгт холбогдогчийн гэм буруугийн шүүх хуралдаан өнөөдөр Сүхбаатар дүүргийн эрүүгийн хэргийн анхан шатны шүүхэд боллоо. Прокурорын байгууллагаас Эрүүгийн хуулийн 15.1.3 дугаар зүйлд зааснаар яллах дүгнэлт үйлдэж хэргийг шүүхэд шилжүүлжээ.