“Эрдэнэс Тавантолгой” ХК-аас нүүрс тээврийн мэдээллийг ил тод болгож эхэлсэн талаар тус компанийн бүрэн эрхт төлөөлөгч Ж.Ганбат мэдээлэл өгч байна.

Ж.Ганбат: ЭТТ компанид бүрэн эрхт төлөөлөгчөөр томилогдоод 14 хоног боллоо. ЭТТ компанийн бүх мэдээллийг олон нийтэд нээлттэй болгох ажлыг эхлүүлээд байна. Уурхайгаас ямар компани ямар өртөгөөр нүүрс олборлож байна вэ, Цагаан хад руу аль компанийн тээврийн хэрэгслээр тээвэрлэлт хийж байна вэ, түүнээс цаашаа хилээр ямар үнээр гаргаж байгаа зэрэг мэдээллийг олон нийтэд ил болгоно. Өнөөдрийн байдлаар 13 мянган худалдан авагч 347 мянган тээврийн хэрэгслээр нүүрс ачиж байгаа.

Мөн тендерийн худалдан авалттай холбоотой бүх мэдээллийг ил болгоно. Манай компанийн сайт руу ороход олборлогч компаниудтай байгуулсан гэрээг үзэх боломжтой.

Офф-тэйк гэрээний асуудлыг цэгцэлнэ. Тус гэрээ нь үйлдвэрлэгчийн ирээдүйд үйлдвэрлэх бараа бүтээгдэхүүнийг урьдчилан борлуулах гэрээ. Тус компанид дөрвөн офф-тэйк гэрээ бий. Тодруулбал Тавантолгой-Гашуунсухайт чиглэлийн төмөр замын төсөл, Богдхаан төмөр замын төсөл, Нүүрс баяжуулах үйлдвэрийн төсөл, Газрын тос дамжуулах хоолойг барих төсөл гэсэн дөрвөн гэрээнд офф-тэйк гэрээ хийжээ. Үүнээс гадна ямар нэгэн төсөлтэй холбогдуулахгүйгээр мөнгө санхүүг нь урьдчилж аваад нүүрсээ дараа нь гаргах нөхцөлтэй дөрвөн компанитай гэрээ байгуулсан байсан. Дээрх дөрвөн төслийг санхүүжүүлэх зорилгоор урьдчилгаа төлбөр авсан иймэрхүү тохиолдлоос бид зайлсхийнэ. Энэ нь компанийн мөнгөн урсгалыг хаах, санхүүгийн хүндрэлтэй байдалд орох нөхцөл байдал үүсэх учир цаашид арилжааны гэрээ хийж, нүүрсээ ачуулж төлбөрөө авдаг болно. ЭТТ гаргаж байгаа нүүрс бүрийнхээ мөнгийг оруулж ирдэг болно.