• Пап Францисын айлчлалд зориулан гаргасан маркийн нээлт боллоо
• Тэрбээр Монгол Улсад маргааш хүрэлцэн ирэх гэж байна
• Маркийн анхны өдрийн дугтуйг тамгалж, гарын үсэг зурснаар албан ёсоор үнэт цаас болов

“Монгол Шуудан” компани түүхэн, чухал үйл явдлуудаар тусгай марк үйлдвэрлэн гаргадаг уламжлалтай.

Энэ удаагийн тусгай маркийг Гэгээн ширээт улсын төрийн тэргүүн Пап Францисын Монгол дахь айлчлалд зориулан гаргалаа. Уг маркийг бүтээхэд Монгол дахь Ватиканы Католик шашны төлөөлөгчийн газрын хамт олон зураг материал, зөвлөгөө өгч, хамтран ажиллажээ.

Өнөөдөр буюу наймдугаар сарын 31-ний өдөр уг маркийн нээлтийг хийлээ. Маркийн анхны өдрийн дугтуйг тамгалж, гарын үсэг зурснаар албан ёсоор уг марк үнэт цаас болж байна.
“Монгол Шуудан” компанийн гүйцэтгэх захирал Б.Анхбаатар маркийн дээжээс ирсэн зочдод гардуулж өгөв. 33х45 мм хэмжээтэй уг маркийн нүүрний үнэ 3000 бол дугтуйны үнэ 8000 төгрөг байна.