Дэлхийн эрүүл мэндийн байгууллага эсвэл Америкийн вакцины тусгай агентлагаас баталсан вакцин тариулаагүй хүмүүс хилийн дээс алхах боломжгүй болох шинэ журмыг АНУ гаргахаар төлөвлөж байна. Үүнд мөн монголчуудын тариулсан "Спутник V" вакцин багтаж байгаа юм. 

Оросын эрх баригчид "вакцинаар ялгаварлан гадуурхлаа" хэмээн дургүйцлээ илэрхийлжээ. АНУ өмнө нь цар тахлын оргил үед  "Спутник" тариулсан Оросын иргэдийг хил нэвтрүүлж байсан ч саяхнаас зогсоосон байна. 

Оросын гадаад бодлогын газар, Төрийн думын гишүүд болон хувийн хөрөнгө оруулалтын сангийн төлөөлөгч нар сүүлийн үед ДЭМБ "Спутник V" вакцинд  зөвшөөрөл олгохгүй байгаад гомдолтой байгаагаа илэрхийлжээ.

АНУ ирэх арваннэгдүгээр сараас эхлэн вакцины бүрэн тунд хамрагдсан хүмүүсийг хилээр нэвтрүүлэх тухай шинэ журам гаргасан. Одоогоор АНУ-ын иргэн л биш бол тус улсын хилээр нэвтрэх боломжгүй байгаа юм. Харин шинэ журмаар аль ч улсын иргэд вакцинд бүрэн хамрагдсаныг тодорхойлох гэрчилгээ, нисэхээс өмнөх гурав хоног дотор өгсөн коронавирусний шинжилгээний сөрөг хариутай байх хэрэгтэй юм. 

Эх сурвалж:ВВС