Португалийн супер од Криштиану Роналдуг Тегеранд ирэхэд нь Ираны хөлбөмбөгийн дэмжигчид угтахаар цугларч, багийнх нь автобусыг бүчин дагаж гүйцгээжээ.

Саудын Арабын Аль Наср клубын тамирчан 38 настай Роналду мягмар гарагийн орой Ираны Персеполис багтай тоглохоор Тегеранд иржээ. Домогт тамирчныг ойроос харах ховорхон боломжийг алдахгүйн тулд түүний зочид буудлын гадаа шүтэн бишрэгчид нь цугларчээ. Тэд долоон жилийн хоригийн төгсгөлийг тэмдэглэн хуулбарласан өмсгөлөөрөө даллан баярласан байна.

Иран улс дэлхийн бусад улс орнуудтай дипломат харилцаа тогтворгүй байгаа тул хөлбөмбөгийн шилдэг клубууд болон алдартай тамирчид тус улсад бараг ирдэггүй. Өөрөөр хэлбэл менежерүүд, ивээн тэтгэгчид болон даатгалын компаниуд энэ төрлийн айлчлалын эрсдэлийг тооцоолон шилдэг тамирчнаа Иран руу явуулахаас татгалздаг байна.

2016 онд Ираны хатуу үзэлтэй зэвсэгт этгээдүүд Тегеран дахь Саудын Арабын элчин сайдын яам руу халдсанаас хойш "Аль Наср" нь Иранд ирсэн анхны Саудын Арабын клуб болжээ. Үүний дараа Саудын Арабын багууд аюулгүй байдал нь баталгаатай биш хэмээн олон улсын спортын тэмцээнд оролцохоор Иран руу явахаас татгалзжээ.

Гэвч долоон жил төвийг сахисан газруудад тоглосны эцэст Саудын Араб Азийн хөлбөмбөгийн холбооны аваргуудын лигийн энэ удаагийн тоглолтод тавьсан хоригоо цуцаллаа. Үүнд хоёр томоохон хүчин зүйл нөлөөлсөн гэж үзэж байна. Нэгдүгээрт, Хятадын зуучлалаар Иран, Саудын Араб хоёр дипломат харилцаагаа сэргээсэн. Хоёрдугаарт, Саудын Арабын клубууд дотоодын лигтээ дэлхийн хэмжээний хөлбөмбөгийн авьяастнуудыг авахын тулд ихээхэн хөрөнгө оруулалт хийж эхэлсэн явдал юм.

Эх сурвалж: BBC