Бидний тухай
Сурталчилгаа байршуулах
Редакцийн ёс зүй
Нууцлалын бодлого
Холбоо барих
Онцлох
Шинэ
Тренд
Буцах
7786
Аутизмтай, авьяаслаг хүү Б.Ерөөлтийн талаарх “Тэр өөрийн ертөнцдөө өөрийнхөөрөө оршдог” нийтлэлийг бид өмнө нь хүргэж байсан билээ.
Төгөлдөр хуурч, мөн тусгай олимпын Азийн бүсийн манлайлагч тамирчин Б.Ерөөлт урлагийн бие даасан анхны тоглолтоо хийхээр бэлдэж байна. Б.Ерөөлт 13 жилийн турш сурч, эзэмшсэн төгөлдөр хуурын хөгжмөөсөө сорчлон бие даасан тоглолтоо хийх юм.
ТҮҮНИЙ ТӨГӨЛДӨР ХУУРЫН АВЬЯАС ХОЁР НАСТАЙ БАЙХАД НЬ ТОДОРЧЭЭ
Ерөөлт хоёр настай байхдаа тоглоомон төгөлдөр хуурыг маш богино хугацаанд гаргууд сайн тоглож сурчээ. Өөрөө бие даан ая тоглож буй хүүгийнхээ авьяасыг анзаарсан ээж, аав нь чанга дуугаралттай арай том Casio төгөлдөр хуур авч өгсөн байна. Гэтэл нэг өдөр хүү төгөлдөр хуурынхаа дууг сонсоод эвгүйцсэн үү тоглох дургүй болов. Чимээг нь сонсох бүрдээ дургүйцэн чихээ дарж, өнөөхөө хувцасны шүүгээний доор хийчихдэг байжээ. Аав, ээж нь гаргаад ирэхээр л шүүгээнийхээ доор буцаагаад хийчихдэг байв.
Өдгөө багш шавь хоёр аялгуут 13 жилийг ардаа үдээд тун удахгүй бие даасан анхны тоглолтоо хийх гэж байна.
Цоо шинэ төгөлдөр хуур тоосонд дарагдан 5 жил болсныг ээж нь анзаарч нэг өдөр гаргаж ирэхэд Ерөөлт өмнөх айдсаа мартсан уу, эсвэл айдастайгаа нүүр тулахаар шийдсэн үү ихэд сонирхон тоглож тэрхүү төгөлдөр хуурын санд байх бүх хөгжмийг гаргууд сайн тоглодог болжээ.
Тиймээс хүүгийнхээ авьяасыг мэргэжлийн багшаар чиглүүлэхээр анх ХУД-ийн Соёлын төвийн багшид шалгуулахад хүү сонсгол сайтай, авьяастай болохыг хэлсэн байна. Түүний хамгийн анхны багш бол Хан-Уул дүүргийн соёлын ордны багш В.Баттулга юм. Хүүг 8 настай байхад “Алегро” хөгжмийн сургуульд анх шалгаж авсан багш, төгөлдөр хуурч П.Болормаа түүнд хөгжмийн хичээл заахаар болж өдгөө багш шавь хоёр аялгуут 13 жилийг ардаа үдээд бие даасан анхны тоглолтоо тун удахгүй хийх гэж байна.
"МЭРГЭЖЛИЙН ТӨГӨЛДӨР ХУУРЧИЙН ЧАДВАР, ӨНГӨ АЯСЫГ БИ ШАВИАСАА ОЛЖ ХАРДАГ"
Төгөлдөр хуур дээр тоглож чаддаг хөгжмөө тоолсон уу гэхэд “Тоогоо алдсан шүү дээ” хэмээх нь түүний хэр шаргуу, хөдөлмөрч зантайг илтгэнэ. Аутизмтай хүний нэг зан төлөв нь өөрийн сонирхсон, хийхийг хүссэн зүйлдээ сэтгэл зүй, цаг заваа 100 хувь зарцуулж, өөрийгөө бүрэн дайчилж чаддагт оршдог. Тиймдээ ч тэд ямар нэгэн төрлийн зүйлд онцгой чадвартай, авьяастай байх нь бий.
Түүний багш П.Болормаа ч үүнийг нь хэлж байлаа. “Өнгөрсөн 13 жилийн хугацаанд Б.Ерөөлт гэрийн даалгавар хийгээгүй үе нэг ч байгаагүй. Хийгээрэй л гэсэн бол хэчнээн ядарч байсан ч хийдэг. Зарим хүүхэд гөжүүдэлж, эсвэл залхуурах аястай байдаг бол Ерөөлт маань зөрүүдэлж, уурлаж байсан удаагүй. Нэг удаа хэлэхэд л шууд хүлээж аваад хөгжмөө тоглодог онцлогтой. Аливааг хүлээж авах, ойлгох чадвар сайн. Заримдаа хөгжим тоглохоороо намайг хүртэл уйлуулчихдаг хүүхэд шүү дээ. Мэргэжлийн төгөлдөр хуурчийн чадвар, өнгө аясыг би Б.Ерөөлтөөс олж хардаг” гэсэн юм.
ТЭР ТОГЛОЛТДОО ЧӨЛӨӨТ ЗОХИОЛООС ИЛҮҮТЭЙ СОНГОДОГ ХӨГЖМҮҮДИЙГ СОРЧЛОН ХҮРГЭНЭ
Чөлөөт зохиолоос "Харанга" хамтлагийн "Үзэсгэлэнт минь", "Queen" хамтлагийн "Bohemian Rhapsody", "We are the champions" зэрэг хөгжмийг тоглох дуртай бол дуртай зохиолч Унгарын хөгжмийн зохиолч Франц Лист, Польшийн хөгжмийн зохиолч Фредерик Шопен юм. Тэр тоглож буй аяныхаа өгүүлж буй гол санааг мэдрэхийг хичээдэг гэнэ.
Сонгодог хөгжмийг тоглоход зөвхөн гараараа биш зүрх сэтгэлээрээ мэдэрдэг
Б.Ерөөлт "Амархан аяыг 2-3 хоногтоо гартаа оруулчихдаг ч томоохон сонгодог хөгжмүүдийг тоглоход зөвхөн гараараа биш зүрх сэтгэлээрээ мэдэрдэг учир өөрийн болгоход багагүй цаг зав шаарддаг. Төгөлдөр хуур их нарийн хөгжим шүү дээ. Аль хэсэгт нь өргөлттэй, динамик, нюансыг нь тохируулах гэх мэт багагүй донж шаарддаг. Яг л дуучин дуугаа дуулдагтай адилхан гэсэн үг" гэж байлаа.
2022 онд болсон И.С.Бахын нэрэмжит Төгөлдөр хуурын тэмцээнд оюутан насны ангилалд тэргүүн байр эзэлжээ.
"Төгөлдөр хуур хүний сэтгэлийг хөдөлгөдөг гоё хөгжим. Цаашдаа төгөлдөр хуур хөгжмөөрөө амжилт гаргаж дэлхийн алдартай театруудад оркестрын хамт тоглохыг хүсэж байна" гэсэн юм.
Мөн Б.Ерөөлт Монгол Улсын тусгай олимпын тамирчин төдийгүй, Тусгай олимпын Азийн бүсийн манлайлагч тамирчин юм. Тэрбээр 10 настайгаасаа хойш ширээний теннис тоглож, Азидаа тэргүүлэх мундаг тамирчин билээ. Одоогоор зөвхөн нэг л зүйлдээ төвлөрөхөөр фитнесс, ширээний теннис зэрэг спортын төрлүүдээр хичээллэхээ түр хойшлуулсан гэж байлаа.
Төгөлдөр хуурч Б.Ерөөлт 17-ны үдэш алдартай сонгодог хөгжмөөрөө ирсэн зочдын сонорыг мялаана. Тоглолт 2023 оны 3-р сарын 17-ны Баасан гарагт 17:00 цагаас Монгол Улсын Консерватори (Хөгжим бүжгийн коллеж)-ийн Б зааланд болох ба сонгодог урлаг сонирхогч хүн бүрд нээлттэй буюу үнэ төлбөргүй болох юм.
Аутизмтай, авьяаслаг хүү Б.Ерөөлтийн талаарх “Тэр өөрийн ертөнцдөө өөрийнхөөрөө оршдог” нийтлэлийг бид өмнө нь хүргэж байсан билээ.
Төгөлдөр хуурч, мөн тусгай олимпын Азийн бүсийн манлайлагч тамирчин Б.Ерөөлт урлагийн бие даасан анхны тоглолтоо хийхээр бэлдэж байна. Б.Ерөөлт 13 жилийн турш сурч, эзэмшсэн төгөлдөр хуурын хөгжмөөсөө сорчлон бие даасан тоглолтоо хийх юм.
ТҮҮНИЙ ТӨГӨЛДӨР ХУУРЫН АВЬЯАС ХОЁР НАСТАЙ БАЙХАД НЬ ТОДОРЧЭЭ
Ерөөлт хоёр настай байхдаа тоглоомон төгөлдөр хуурыг маш богино хугацаанд гаргууд сайн тоглож сурчээ. Өөрөө бие даан ая тоглож буй хүүгийнхээ авьяасыг анзаарсан ээж, аав нь чанга дуугаралттай арай том Casio төгөлдөр хуур авч өгсөн байна. Гэтэл нэг өдөр хүү төгөлдөр хуурынхаа дууг сонсоод эвгүйцсэн үү тоглох дургүй болов. Чимээг нь сонсох бүрдээ дургүйцэн чихээ дарж, өнөөхөө хувцасны шүүгээний доор хийчихдэг байжээ. Аав, ээж нь гаргаад ирэхээр л шүүгээнийхээ доор буцаагаад хийчихдэг байв.
Өдгөө багш шавь хоёр аялгуут 13 жилийг ардаа үдээд тун удахгүй бие даасан анхны тоглолтоо хийх гэж байна.
Цоо шинэ төгөлдөр хуур тоосонд дарагдан 5 жил болсныг ээж нь анзаарч нэг өдөр гаргаж ирэхэд Ерөөлт өмнөх айдсаа мартсан уу, эсвэл айдастайгаа нүүр тулахаар шийдсэн үү ихэд сонирхон тоглож тэрхүү төгөлдөр хуурын санд байх бүх хөгжмийг гаргууд сайн тоглодог болжээ.
Тиймээс хүүгийнхээ авьяасыг мэргэжлийн багшаар чиглүүлэхээр анх ХУД-ийн Соёлын төвийн багшид шалгуулахад хүү сонсгол сайтай, авьяастай болохыг хэлсэн байна. Түүний хамгийн анхны багш бол Хан-Уул дүүргийн соёлын ордны багш В.Баттулга юм. Хүүг 8 настай байхад “Алегро” хөгжмийн сургуульд анх шалгаж авсан багш, төгөлдөр хуурч П.Болормаа түүнд хөгжмийн хичээл заахаар болж өдгөө багш шавь хоёр аялгуут 13 жилийг ардаа үдээд бие даасан анхны тоглолтоо тун удахгүй хийх гэж байна.
"МЭРГЭЖЛИЙН ТӨГӨЛДӨР ХУУРЧИЙН ЧАДВАР, ӨНГӨ АЯСЫГ БИ ШАВИАСАА ОЛЖ ХАРДАГ"
Төгөлдөр хуур дээр тоглож чаддаг хөгжмөө тоолсон уу гэхэд “Тоогоо алдсан шүү дээ” хэмээх нь түүний хэр шаргуу, хөдөлмөрч зантайг илтгэнэ. Аутизмтай хүний нэг зан төлөв нь өөрийн сонирхсон, хийхийг хүссэн зүйлдээ сэтгэл зүй, цаг заваа 100 хувь зарцуулж, өөрийгөө бүрэн дайчилж чаддагт оршдог. Тиймдээ ч тэд ямар нэгэн төрлийн зүйлд онцгой чадвартай, авьяастай байх нь бий.
Түүний багш П.Болормаа ч үүнийг нь хэлж байлаа. “Өнгөрсөн 13 жилийн хугацаанд Б.Ерөөлт гэрийн даалгавар хийгээгүй үе нэг ч байгаагүй. Хийгээрэй л гэсэн бол хэчнээн ядарч байсан ч хийдэг. Зарим хүүхэд гөжүүдэлж, эсвэл залхуурах аястай байдаг бол Ерөөлт маань зөрүүдэлж, уурлаж байсан удаагүй. Нэг удаа хэлэхэд л шууд хүлээж аваад хөгжмөө тоглодог онцлогтой. Аливааг хүлээж авах, ойлгох чадвар сайн. Заримдаа хөгжим тоглохоороо намайг хүртэл уйлуулчихдаг хүүхэд шүү дээ. Мэргэжлийн төгөлдөр хуурчийн чадвар, өнгө аясыг би Б.Ерөөлтөөс олж хардаг” гэсэн юм.
ТЭР ТОГЛОЛТДОО ЧӨЛӨӨТ ЗОХИОЛООС ИЛҮҮТЭЙ СОНГОДОГ ХӨГЖМҮҮДИЙГ СОРЧЛОН ХҮРГЭНЭ
Чөлөөт зохиолоос "Харанга" хамтлагийн "Үзэсгэлэнт минь", "Queen" хамтлагийн "Bohemian Rhapsody", "We are the champions" зэрэг хөгжмийг тоглох дуртай бол дуртай зохиолч Унгарын хөгжмийн зохиолч Франц Лист, Польшийн хөгжмийн зохиолч Фредерик Шопен юм. Тэр тоглож буй аяныхаа өгүүлж буй гол санааг мэдрэхийг хичээдэг гэнэ.
Сонгодог хөгжмийг тоглоход зөвхөн гараараа биш зүрх сэтгэлээрээ мэдэрдэг
Б.Ерөөлт "Амархан аяыг 2-3 хоногтоо гартаа оруулчихдаг ч томоохон сонгодог хөгжмүүдийг тоглоход зөвхөн гараараа биш зүрх сэтгэлээрээ мэдэрдэг учир өөрийн болгоход багагүй цаг зав шаарддаг. Төгөлдөр хуур их нарийн хөгжим шүү дээ. Аль хэсэгт нь өргөлттэй, динамик, нюансыг нь тохируулах гэх мэт багагүй донж шаарддаг. Яг л дуучин дуугаа дуулдагтай адилхан гэсэн үг" гэж байлаа.
2022 онд болсон И.С.Бахын нэрэмжит Төгөлдөр хуурын тэмцээнд оюутан насны ангилалд тэргүүн байр эзэлжээ.
"Төгөлдөр хуур хүний сэтгэлийг хөдөлгөдөг гоё хөгжим. Цаашдаа төгөлдөр хуур хөгжмөөрөө амжилт гаргаж дэлхийн алдартай театруудад оркестрын хамт тоглохыг хүсэж байна" гэсэн юм.
Мөн Б.Ерөөлт Монгол Улсын тусгай олимпын тамирчин төдийгүй, Тусгай олимпын Азийн бүсийн манлайлагч тамирчин юм. Тэрбээр 10 настайгаасаа хойш ширээний теннис тоглож, Азидаа тэргүүлэх мундаг тамирчин билээ. Одоогоор зөвхөн нэг л зүйлдээ төвлөрөхөөр фитнесс, ширээний теннис зэрэг спортын төрлүүдээр хичээллэхээ түр хойшлуулсан гэж байлаа.
Төгөлдөр хуурч Б.Ерөөлт 17-ны үдэш алдартай сонгодог хөгжмөөрөө ирсэн зочдын сонорыг мялаана. Тоглолт 2023 оны 3-р сарын 17-ны Баасан гарагт 17:00 цагаас Монгол Улсын Консерватори (Хөгжим бүжгийн коллеж)-ийн Б зааланд болох ба сонгодог урлаг сонирхогч хүн бүрд нээлттэй буюу үнэ төлбөргүй болох юм.