Засгийн газрын хуралдаанаас гаргасан шийдвэрийг танилцуулж байна. Өнөөдрийн хурлаар Гэр бүл, хөдөлмөр нийгмийн хамгааллын яамны Төрийн нарийн бичгийн даргаар Нийгмийн даатгалын ерөнхий газрын даргаар ажиллаж байсан Л.Мөнхзулыг томилжээ. 

Мөн

• Нийслэлийн хэмжээнд хэрэгжүүлэх төслүүдийн талаар (гүүр, туннел, метро, орон сууцжуулалт)
• Хөшигийн хөндий-Чойр-Замын-Үүд чиглэлийн 2 эгнээ тусгай зориулалтын авто зам барих төслийг хэрэгжүүлэх тухай
• Улаанбаатар-Шинэ Хархорум чиглэлийн төмөр замын төслийн ажлын явц
• Улсын төсвийн хөрөнгө оруулалтын талаар авах зарим арга хэмжээний тухай Засгийн газрын тогтоолуудын хэрэгжилтийн талаар зэрэг 10 гаруй асуудал хэлэлцсэн.

Нийслэлд хэрэгжих томоохон төсөл хөтөлбөрүүдийн талаар Р.Эрдэнэбүрэн сайд дараах мэдээллийг өглөө. Тэрбээр Миний бие болон Улаанбаатар хотын дарга Х.Нямбаатар нар хамтарсан засгийн газрын гэрээ, мөрийн хөтөлбөрт оруулах томоохон төсөл хөтөлбөрүүдийн талаар хуралдаанд танилцууллаа.

Улаанбаатар хотын түгжрэлийг багасгах, 20 минутын хот концепцыг хэрэгжүүлэх үндсэн арга зам нь томоохон төсөл хэрэгжүүлэхээс гадна Улаанбаатар хотын тодорхой хэсэг, тэр тусмаа төрийн байгууллагуудаа Богд уулын урд тал руу гаргах зайлшгүй шаардлагатай гэж үзсэн. 

Энэ хүрээнд тодорхой төслүүдийг танилцуулсан. Эдгээр нь өнөөдөр гэнэт яригдаж буй зүйл биш. Өмнөх Засгийн газрын үед ч судалгаа, тооцоо маш сайн хийж байсан төслүүд. Энэ хүрээнд Go Mongolia буюу "Өөдөө тэмүүлэх Монгол" гээд гар татлагат 900 метр гүүр хийх, гүүрний цаад тал руу Богд уулын 5.6 км туннел барина. 

Цаашлаад төрийн захиргааны байгууллагуудын нэгдсэн цогцолборыг Улаанбаатар хотын Хан-Уул дүүргийн 14-р хорооны нутаг дэвсгэрт буюу Кувейтын ам гэж ярьдаг хэсэг рүү гаргах, Хөшигтийн хөндийн бүтээн байгуулалтын ажлын хүрээнд их багтаамжийн нийтийн тээврийн хэрэгсэл метротой уялдуулан хөнгөн галт тэрэгний шугамын төслийг хэрэгжүүлэх, Туулын хурдны зам болон шинэ тойрог замын ажлыг эхлүүлэх гэх мэт үндсэн томоохон төслүүдийг Засгийн газрын хуралд танилцуулсан гэв.