Баянзүрх дүүргийн Онцгой комиссын шуурхай штабын дарга Г.Жаргалсайхан Баянзүрх дүүргийн 17-р хороонд хэсэгчилсэн хөл хорио тогтоохтой холбогдуулан мэдээлэл хийж байна. 

(Энэхүү видео тоглох боломжгүй бол ЭНД дарж үзнэ үү )

Баянзүрх дүүргийн 17-р хороонд “КОВИД 19” халдварын тохиолдол батлагдаж, голомтлон тархаж болзошгүй нөхцөл байдал үүссэн тул 2021.01.14-ны 06.00 цагаас 2021.01.16-ны 23.00 цаг хүртэл хязгаарлалтын дэглэмд шилжүүлж, иргэдийг шинжилгээнд хамруулах ажлыг зохион байгуулахаар болсныг Баянзүрх дүүргийн Онцгой комиссын шуурхай штабын дарга Г.Жаргалсайхан мэдээллээ. 

Хөл хорио тогтоосон хугацаанд явуулын болон суурин нийт 10 шинжилгээний цэгийг байгуулж, 18-аас дээш насны бүх иргэнээс өмнө шинжилгээ өгсөн эсэхийг үл харгалзан PCR шинжилгээг авах юм байна.

Хязгаарлалт тогтоосон хугацаанд 17-р хорооны нутаг дэвсгэрт үйл ажиллагаа явуулдаг хүнсний дэлгүүр, эмийн сан, эмнэлгийн үйлчилгээ хэвийн явагдаж, бусад хөдөлгөөн хязгаарлагдах учраас шинжилгээ өгөхөөс бусад тохиолдолд гэрээсээ гарахгүй байхыг анхаарууллаа. 

Зөвлөгөө, шинжилгээтэй холбоотой мэдээллийг Баянзүрх дүүргийн шуурхай штабын 80535063, 93190092, 1900-1063 дугаараас лавлах боломжтой.

Тус дүүргийн 17-р хороо нь Шархад, Да-Хүрээ орчим бөгөөд зурагт хорооны байршлыг харуулсан болно. 

17-Р ХОРООНЫ ИРГЭДЭЭС ШИНЖИЛГЭЭ АВАХ БАЙНГЫН 4 ЦЭГ:

• 79-р сургуулийн 1-р байр
• 17-р хорооны иргэд нийтийн танхим
• 21-р худаг
• Өргөн гудамжны “Баян” дэлгүүр

Мөн явуулын зургаан цэг ажиллаж 08.30-18.30 цагийн хооронд иргэдээс шинжилгээ авна.