Монголын сагсан бөмбөгийн шигшээ баг Азийн аварга шалгаруулах тэмцээний дараагийн шатанд тоглох эрхээ баталгаажууллаа.

Тодруулбал, Сагсан бөмбөгийн 2025 оны Азийн аварга шалгаруулах тэмцээний урьдчилсан шатанд өрсөлдөх багуудыг тодруулах сонгон шалгаруулалтын тэмцээн Монгол улсад болж байна.

Сонгон шалгаруулалтын 1-р шатны D хэсгийн хоёрдугаар байраар 2-р шатанд шалгарсан Монголын шигшээ баг өнөөдөр Сингапурыг хожсоноор урьдчилсан шатанд тоглох эрхээ баталгаажуулав. Тэд Сингапурыг 73-49 харьцаагаар илүүрхсэн бөгөөд Д.Дэлгэрням 16, Г.Баттөр 13, О.Энхбаатар 12 оноо авч багаа тэргүүлсэн.

Монголын шигшээ баг өчигдөр Хонконгийг 76-69 харьцаагаар хожсон бөгөөд маргааш Гуамын шигшээ багтай тоглож хэсгийн хэддүгээр байраар урьдчилсан шатанд тоглохоо шийдэх юм.

Гуам болон Тайландын шигшээ багууд мөн урьдчилсан шатанд тоглох эрхээ баталгаажуулсан ба 2-р шатнаас шалгарсан дөрвөн багийг Австрали, Шинэ Зеланд, Хятад, Өмнөд Солонгос, Филиппин, Япон, Тайвань, Индонез улсын багууд хүлээж байна.