Зургаан хувийн хүүтэй ипотекийн зээлийг өчигдрөөс /10.16/ арилжааны банкууд олгож эхэллээ гэдгийг Барилга хот байгуулалтын сайд Б.Мөнхбаатар мэдэгдэв.
Зээлийн хүүг 8-аас 6 хувь болгон бууруулснаар өрхийн орлого нь 1 сая төгрөгт хүрсэн өрхүүд энэ зээлийг авах нөхцөл бүрджээ. Гэр хорооллын иргэдэд зээл авах боломж олгох зорилгоор ийнхүү хүүг 2 нэгжээр буулгасан байна. Арилжааны банкууд 40 тэрбум, Монголбанк 50 тэрбум төгрөгийн санхүүжилт гаргажээ.
Энэ зээлийг 8 хувийн хүүтэй зээлийг олгоход баримталдаг журмын дагуу олгоно. Мөн өмнө нь 8 хувийн хүүтэй зээл авсан иргэдийн зээлийг 6 хувь болгон бууруулахгүй гэдгийг Төв банкнаас мэдэгдсэн юм. Дэлгэрэнгүйг ЭНД дарж хүлээн авна уу.
МОНГОЛЫН ҮНДЭСНИЙ ЦИРКИЙГ ТОЙРСОН АСУУДАЛ ОЛНЫ АНХААРЛЫГ ТАТАВ
Монголын Үндэсний Циркийг тойрсон асуудал болоод засварын ажил ямар шатандаа явж байгаа талаар тодруулахаар бид циркийг зорилоо. Гадуур нь барилгын өндөр хашаа босгосон бөгөөд хашааны хаалгыг дотроос нь цоожилсон байдалтай, хаалгыг нь нүдэхэд онгойлгоогүй юм.
Хашаан дотор нь экскаватор зогссон, нэг ч хүн харагдаагүй. Захиргаанаас барилгын үйл ажиллагааны талаар болон циркийг цаашид ямар өнгө үзэмж, техникийн тоног төхөөрөмжтэй болгох, циркийн зориулалтаар нь цаашид ашиглах эсэхийг асуухаар очиход хуучин байсан газраа байсангүй. Ойр хавийн хүмүүсээс асуухад циркийн урд талд байрлах Рояал Плазад захиргаа байгаа гэв. Гэвч дотор нь ажиллаж байгаа хүмүүс "Энд циркийн захиргаа байдаггүй" гэсэн хариултаас өөр зүйл сонссонгүй. Сурвалжилгын дэлгэрэнгүйг, фото мэдээг ЭНД дарж хүлээн авна уу.
“БАГШИЙН ЦАЛИН, УРАМШУУЛЛЫГ СУРАГЧДЫН СУРЛАГЫН АМЖИЛТТАЙ УЯЛДУУЛАН НЭМЭГДҮҮЛНЭ”
УИХ-ын чуулганы ээлжит хуралдаан өчигдөр /2020.10.16/ боллоо. Чуулганы нэгдсэн хуралдаанаар Монгол Улсын 2021 оны төсвийн тухай, Нийгмийн даатгалын сангийн 2021 оны төсвийн тухай, Эрүүл мэндийн даатгалын сангийн 2021 оны төсвийн тухай хуулийн төслүүд /Засгийн газар 2020.09.30-ны өдөр өргөн мэдүүлсэн, нэг дэх хэлэлцүүлэг/-ийг хэлэлцэж байна. Ирэх оны төсвийн төслийг Ерөнхий сайд У.Хүрэлсүх танилцуулсан юм.
Ерөнхий сайд У.Хүрэлсүх "Засгийн газар 2020 оны есдүгээр сарын байдлаар 9.3 их наяд төгрөгийн өр зээлийг төлсөн. Олон улсын байгууллагууд 2021 онд Монгол Улсын эдийн засаг хурдтай сэргэнэ гэж үзэж байна. Тухайлбал, Дэлхийн банк манай улсын эдийн засгийг 5.6 хувь, ОУВС 8 хувьд хүрнэ гэж үзэж байна. Засгийн газар ирэх онд эдийн засгийн өсөлтийг 6 хувьд хүргэх төлөвлөгөөтэй ажиллаж байна" хэмээн илтгэлдээ дурдав. Монгол Улсын Ерөнхий сайд У.Хүрэлсүхийн Монгол Улсын 2021 оны нэгдсэн төсвийн талаар УИХ-ын чуулганд хэлсэн үгийг бүрэн эхээр нь ЭНД дарж хүлээн авна уу.
ТАВАН НАСТАЙ ХҮҮХДИЙН ЭЛГИЙГ ХЭСЭГЧЛЭН ТАЙРАХ МЭС ЗАСАЛ АМЖИЛТТАЙ ХИЙЛЭЭ
ЭХЭМҮТ-ийн Ерөнхий мэс заслын тасгийнхан Хавдар судлалын үндэсний төвийн Элэг, цөс, нойр булчирхайн мэс заслын тасгийн эмч Г.Үнэнбат нар хамтарч таван настай охинд элэгний хавдрыг хэсэгчлэн тайрах хагалгаа хийжээ.
Таван настай охины хувьд өөр шалтгаанаар ЭХЭМҮТ-д хандсан бөгөөд энэ үед хавдар нь оношлогдож, цаг алдалгүй нарийн мэргэжлийн тусламж авч, өвчнөөсөө ангижирсан байна. Хагалгаа амжилттай явагдаж, охин эрүүл саруул болж эмнэлгээс гарчээ.
ЭХЭМҮТ-ийн Ерөнхий мэс заслын тасагт төрөлхийн хавдартай бага насны хүүхдүүд хагалгаанд орох тохиолдол олон бөгөөд хоёр сартай хүүхэд ч хорт хавдар авахуулж байсан юм.
КОРОНАВИРУСИЙН НИЙТ ТОХИОЛДЛЫН ТОО 320 БОЛЛОО
Одоогоор манай улсад зөөвөрлөгдөн ирсэн тохиолдлын тоо 320 байгаа ба тэдний 311 нь эдгэрч, 9 нь эмчлэгдэж байгаагийн 7 нь хөнгөн, 2 нь хүндэвтэр байгаа аж.
Хамгийн сүүлд 10-р сарын 10-нд Токио-УБ-ын онгоцоор ирсэн 30 настай эрэгтэй, 20 настай эмэгтэйгээс коронавирус илэрсэн бөгөөд ийнхүү Токио-УБ-ын онгоцоор ирсэн 4 хүнээс вирус илэрлээ.
Мөн тусгаарлах байранд байсан нэг эмэгтэй лхагва гарагт буюу аравдугаар сарын 14-нд ХӨСҮТ-д ирж амаржин, 2.8 кг хүү төрүүлжээ.