“Icarus Space” стартап компани БНХАУ-аас 100 хувь импортоор авдаг пуужинг Монголдоо үйлдвэрлэж, хоёр шатлалт 10 км-ийн пуужингийн туршилтыг хийж байна.

Тус компани Монгол Улсад анхны хоёр шатлалт 10 км-ийн пуужинг үйлдвэрлэсэн бөгөөд одоогоор туршилтын ажиллагаа явуулж байгаа аж. Цаашид пуужингийн технологийг хөгжүүлж, ирэх жилээс 20 км-ийн өндөрт хөөргөх түвшинд хүргэхээр төлөвлөж байгаа юм.

“Icarus Space” нь хиймэл оюунд суурилсан стратосферийн агаарын бөмбөлөг, хиймэл дагуул, судалгааны болон үүл буудах пуужин хөөргөх чиглэлээр стартап үйл ажиллагаа эрхэлдэг байна.

Мөн судалгааны агаарын бөмбөлөг болон үүл буудах технологийг нэг удаа ашиглаад хаях бус, дахин ашиглах боломжтой технологи хөгжүүлэх чиглэлээр туршилт, судалгаа хийжээ.

Түүнчлэн Монгол Улсын сүүлийн 30 жилийн цаг агаар, хөрс, усны мэдээлэлд суурилан хиймэл оюуны тусламжтайгаар цөлжилт, хөрс, ус, ган, зудын мэдээллийг урьдчилан 90 хувийн магадлалтай тооцоолох боломжтой дата хөгжүүлж байгаагаа танилцуулсан байна.

Эдгээр ажлыг өнөөдөр (2026.08.27) Ардчилсан намын дарга О.Цогтгэрэлд танилцууллаа. Уулзалтын үеэр “Icarus Space”-ийн залуус Ардчилсан намаас орон даяар өрнүүлж буй “ӨӨРЧИЛЬЕ, БҮТЭЭЕ” үндэсний хөдөлгөөнд нэгдэж, хөдөлгөөнөөс гарах 100 шийдэлд өөрсдийн судалгаанд суурилсан саналыг тусгах хүсэлтэй байгаагаа илэрхийлсэн байна.

Эх сурвалж: Ардчилсан нам