Сүхбаатар дүүргийн нэгдүгээр хороонд байрлах Нийслэлийн ерөнхий боловсролын Нэгдүгээр сургуулийн хичээлийн хуучин байрны их засварыг зургаадугаар сарын 25-нд эхлүүлсэн. Тус засварт нийслэлийн төсвөөс 3 тэрбум төгрөг төсөвлөжээ.

Олон жил ашиглагдсан тус барилгын инженерийн шугам сүлжээ, дотор болон гадна хийц, анги танхим, нийтийн эзэмшлийн хэсгүүдийг шинэчлэх шаардлага үүсчээ. 

Засварын ажлыг “Буяннэмэх интер” ХХК гүйцэтгэж байгаа бөгөөд барилгын үндсэн даацын бүтцийг хадгалан үлдээж, инженерийн шугам сүлжээ, цахилгааны дотор монтаж, хана, таазны гипсэн хийц, дотор халаалтын системийг шинэчилж байна.  Мөн барилгын бусад хэсэгт засвар хийхээс гадна гадна фасадын өнгийг сэргээж байгаа аж.

Гүйцэтгэгч компани их засварыг хичээлийн шинэ жил эхлэхээс өмнө бүрэн дуусгаж, хүлээлгэн өгөхөөр ажиллаж байна. Нийслэлийн Засаг даргын орлогч Г.Жаргалсайхан өчигдөр гүйцэтгэгч компанийн төлөөлөл болон холбогдох албаныхны хамт тус сургуулийн их засварын явцтай танилцжээ. 

Улаанбаатар хотын Нэгдүгээр бүрэн дунд сургууль 1923 онд байгуулагдсан бөгөөд 1940 онд Маршал Х.Чойбалсаны санаачилгаар одоо ашиглаж буй дөрвөн давхар хичээлийн байрыг барьсан юм. Тус барилга нь Монгол Улсад баригдсан анхны дөрвөн давхар барилга аж.

Мөн тухайн онд Улсын Бага Хурлын Тэргүүлэгчдийн тогтоолоор тус сургуулийг Маршал Х.Чойбалсангийн нэрэмжит Улсын лаборатори Нэгдүгээр сургууль хэмээн нэрлэсэн байна.

Эх сурвалж: Нийслэлийн хөрөнгө оруулалтын газар