33 дахь Ерөнхий сайд Л.Оюун-Эрдэнийн тэргүүлсэн Засгийн газар “Шинэ хоршоо” хөдөлгөөнийг санаачлан хэрэгжүүлсэн. Мал аж ахуйн салбарын нэмүү өртөг шингэсэн бүтээгдэхүүн үйлдвэрлэлийг нэмэгдүүлэх, малын гаралтай түүхий эд, бүтээгдэхүүний мөнгөн урсгалыг тогтмолжуулах, малчдын ажил амьдралыг шинэ шатанд гаргахад чиглэсэн урт хугацааны бодлогын хөтөлбөр хэмээн уг хөдөлгөөнийг олон нийтэд сурталчилж байв.

"Шинэ хоршоо" хөдөлгөөний хүрээнд 2024 оны 5-р сараас 2025 оны 12-р сар хүртэлх хугацаанд 26400 малчид, хоршоодод 6 хувийн хүүтэй,  894.8 тэрбум төгрөгийн зээл олгожээ.

2024 оны УИХ-ын сонгуулийн өмнөхөн олгож эхэлсэн уг зээлийн эргэн төлөлт ямар түвшинд байгааг Монголбанкны Санхүүгийн тогтвортой байдлын газрын захирал Б.Амгалангаас тодруулахад,
2026 оны 7-р сарын байдлаар “Шинэ хоршоо“ хөдөлгөөний зээлийн үлдэгдэл 676 тэрбум төгрөг байна. Засгийн газрын татаастай уг зээлийн чанаргүй зээл нь 0.3 хувь. Банкны системийн чанаргүй зээл дунджаар 5 хувьтай байдаг бол Шинэ хоршоо хөтөлбөрийн зээлийн чанаргүйдэл бага гэсэн үг гэж хариулав.

“Шинэ хоршоо” хөдөлгөөний хүрээнд хоршооны гишүүн нэг малчинд дээд тал нь 50 сая төгрөг, харин нэг хоршоонд хоёр тэрбум хүртэлх төгрөгийн зээл олгох шийдвэр гарсан.

Зээлийн санхүүжилтийг арилжааны банкууд өөрийн эх үүсвэрээс гаргаж “Шинэ хоршоо”-ны гишүүн малчдад олгосон. Уг зээл нь 6 хувийн хүүтэй бөгөөд арилжааны банкууд өөрийн шалгуураар, зах зээлийн зарчмаар зээлээ олгоно. Иймд нэн хөнгөлөлттэй 6 хувийн хүүгийн зөрүү болох 12 хувийг Улсын төсөвт суулган Засгийн газраас банкуудад төлж буй юм.

Хэрэгжиж эхлээд хоёр жил гаруй хугацаа өнгөрч буй энэ хөтөлбөрийн явц болон Засгийн газрын бодлогоор хэрэгжсэн хөнгөлөлттэй зээл нь зорилтот бүлэгтээ хүрсэн эсэх, санхүүжилтийг зориулалтын дагуу зарцуулж буй эсэхийг хэрэгжүүлэгч ХХААХҮЯ-наас олон нийтэд тайлагнах учиртай.