АОЗ-ийн ивээл дор зохион байгуулагдах шар тивийн олимп “Айчи Нагояа 2026” Азийн ХХ наадам эхлэхэд 29 хоног үлдээд байна.

Өнөөдөр ОУОХ-ны гишүүн, МҮОХ-ны Ерөнхийлөгч Б.Баттүшиг, МҮОХ-ны Ерөнхий нарийн бичгийн дарга Э.Бадар-Ууган нар “Айчи–Нагояа 2026” Азийн наадамд оролцох Монголын баг тамирчдын төлөөллийг МҮОХ-ны байранд хүлээн авч уулзан, тус наадамд өмсөх нэгдсэн хувцас хэрэглэлийг албан ёсоор гардууллаа.

Одоогийн байдлаар Монголын баг “Айчи–Нагояа 2026” Азийн наадамд спортын 31 төрөлд нийт 303 тамирчин оролцохоор мэдүүлгээ Зохион байгуулах хороонд хүргүүлээд байна.

Монголоос “Айчи–Нагояа 2026” Азийн наадамд спортын 31 төрөлд нийт 303 тамирчин оролцоно

МҮОХ нь спортын хувцас, хэрэгслийн 361° брэндтэй хамтран ажиллаж, баг тамирчдыг олон улсын тэмцээн, наадамд оролцоход шаардлагатай нэгдсэн хувцас хэрэглэлээр үнэ төлбөргүй хангаж байна.

Ингэснээр улсын төсвөөс зардал гаргалгүй, баг тамирчдын хувцас хэрэгслийн зардлыг бие даан шийдвэрлэж, тамирчдын бэлтгэл, оролцоог бодитоор дэмжиж байгаа юм.

Үүнээс гадна МҮОХ-ны зүгээс наадамд оролцох баг тамирчдын бэлтгэлийг дэмжих зорилгоор спортын холбоодод нийт 100 сая төгрөгийн санхүүгийн дэмжлэгийг хуваарилан олгож байгаа юм.

Монголын баг өмнөх “Ханжоу 2022” Азийн наадамд спортын 34 төрөлд 400 гаруй тамирчин оролцож, хоёр алт, таван мөнгө, 13 хүрэл медаль хүртэн багийн дүнгээр 22 дугаар байрт шалгарсан амжилт үзүүлсэн.

“Айчи–Нагояа 2026” Азийн наадамд Монголын тамирчид өмнөх амжилтаа ахиулах зорилготойгоор бэлтгэлээ хангаж байна.

АОЗ, Зохион байгуулах хорооны мэдээлснээр “Айчи–Нагояа 2026” наадамд урьдчилсан байдлаар 43 спортын 71 зай төрөлд нийт 11,003 тамирчин, 6,264 дасгалжуулагч, албаны төлөөлөгч, 3,609 хэвлэл мэдээллийн ажилтан бүртгүүлжээ.

Оролцогчдын тоогоор Япон улс 939 тамирчинтайгаар тэргүүлж байгаа бол БНХАУ 815, БНСУ 792 тамирчин бүртгүүлээд байна.