Иргэн Лхагвын Батцог Зээлийн мэдээллийн сангийн (хар жагсаалт) сөрөг түүхийг нэг удаа цуцлах (өршөөх) тухай хуулийн төсөл санаачлах тухай өргөдөл гаргаснаа D.Parliament.mn-д 2026 оны 4-р сарын 28-ны өдөр байршуулж, иргэдээс санал авч байна. Уг хуулийн өргөдлийг 30 хоногийн хугацаанд 100 мянган иргэн дэмжиж гарын үсэг зурвал хуулийн төсөл болгон боловсруулж, УИХ-аар хэлэлцэх эрх зүйн орчин бүрдэнэ. Хуулийн төслийг 5-р сарын 15-ны өдрийн 10.00 цагийн байдлаар 1487 хүн дэмжиж гарын үсэг зураад байна.  

Иргэн Л.Батцог хуулийн төслийг яагаад санаачлах болсон талаараа дараах тайлбар бичсэн байна. 

Тайлбарт,
Хугацаа хэтэрсэн зээлээ бүрэн төлж барагдуулсан боловч Зээлийн мэдээллийн сангийн (хар жагсаалт) сөрөг түүхээс болж дахин зээл авах, санхүүгийн үйлчилгээ авах эрх нь хязгаарлагдаад байгаа олон мянган иргэдийн эдийн засгийн эрх чөлөөг сэргээх зорилготой.
Цар тахал болон эдийн засгийн хямралын нөлөөгөөр зээлийн ангилал буурсан иргэдийг нэг удаадаа "хар жагсаалт"-аас гаргаж, дахин санхүүгийн эргэлтэд орох боломжийг олгох хуулийн зохицуулалт хийлгэхийг хүсэж байна. Энэхүү өргөдлийг дэмжсэнээр иргэдийн амьжиргаа дээшлэх, бизнесийн идэвхжил сэргэх бодит нөхцөл бүрдэнэ.

Өргөдөлд,
Нэг. Зээлийн мэдээллийн санд иргэдийн сөрөг түүх зургаан жил хадгалагддаг нь зээлээ төлж дууссан иргэдэд санхүүгийн дарамт болж байна.​
Хоёр. ​Зээлээ бүрэн төлсөн иргэн, ААН-үүдийн сөрөг түүхийг нэг удаадаа бүрэн арилгах. ​Зээлийн мэдээлэл хадгалагдах хугацааг олон улсын жишигт нийцүүлэн богиносгох.​
Гурав. Олон мянган иргэн дахин зээл авах эрхтэй болж, улс орны эдийн засгийн идэвхжил нэмэгдэнэ.​Монгол Улсын Үндсэн хуулиар олгогдсон иргэдийн эдийн засгийн эрх чөлөөг хамгаалах үүднээс энэхүү саналыг УИХ-аар хэлэлцүүлж өгөхийг хүсье гэжээ.

Та саналаа өгөх бол ЭНД дарна уу.