Монголд анх удаа зохиогдож буй "Face of Beauty International 2016" тэмцээнд оролцохоор дэлхийн өнцөг булан бүрээс 60 гаруй орны гоо бүсгүйчүүд Улаанбаатар хотноо ирээд байна.

Аялал жуулчлал, эдийн засаг, соёл урлагийн салбарын хөгжил цэцэглэлтэнд үр өгөөжөө өгч буй "Гоо сайхны олимп"-ийг Mongolian Beauty Association ТББ-аас санаачлан хэрэгжүүлж буй бөгөөд энэ намрын хамгийн том, хамгийн сонирхол татсан үйл явдал болоод байгаа билээ.

Аравдугаар сарын 8-ны өдөр Буянт-Ухаа цогцолборт тэргүүн титмийн эзнээ тодруулахаар товлосон томоохон үйл ажиллагааны гол уриа "МАЗААЛАЙГАА ХАМГААЛЦГААЯ" бөгөөд хөрөнгө мөнгө, хандив тусламжаас хол "жинхэнэ" бодит хөрөнгө оруулалт хийж буй тухай зохион байгуулагчид нь онцолж байна.

Хэдхэн хоногийн өмнөөс 60 орны миссүүдийн Мазаалайн сэдэвт дүрс бичлэг цацагдаж эхэлснээс гадна тун удахгүй Мазаалайн үндэсний чуулганыг зохион байгуулах гэнэ. Түүнчлэн финалын 10 оролцогчоос Монголын говийн баавгайтай холбоотой асуултыг асууж, тэргүүн байрын шагналтныг сонгох юм байна.

Африк тивийн Гана, Европын Эстони, хөрш зэргэлдээ Орос улсын гоо бүсгүйчүүд Мазаалай баавгайг хамгаалахын төлөө чин сэтгэлийн уриалга дэвшүүлсэн нь аль хэдийнэ олон улсын анхаарлыг татсанаас харахад хамгийн үр өгөөжтэй төсөл болж буй бололтой. Юутай ч Украйны "АМЬД БАРБИ", Дэлхийн миссүүд гээд нэг тайзнаас тэр бүр олж харахгүй гоо үзэсгэлэнг дэргэдээс нь үзэх боломж бидэнд олджээ.