Бразилийн Рио-де-Жанейро хотноо зохиогдсон зуны паралимпийн XV наадам өнөөдөр өндөрлөж, хаалтын ажиллагаагаа хийж байна. Энэ удаагийн наадамд дэлхийн 170 орны 4000 гаруй тамирчид спортын 23 төрөлд 528 багц медалийн төлөө хурд хүч авьяас чадлаа сорисон юм.

БНХАУ 239 медальтайгаар жагсаалтыг тэргүүлсэн бол Их Британи 147, Украин 117 медаль тус тус хүртжээ. 

Риогийн паралимпод нийт 83 улс медаль авснаас манай улсын хувьд медалийнхаа тоогоор 75-р байрт жагсав. Манай тамирчдын хувьд хоёр хүрэл медальтайгаар ийнхүү паралимпийг өндөрлүүлж байна. Тодруулбал жүдо бөхийн 60 кг-ын жинд Б.Ууганхүү хүрэл медаль, пауэрлифтингийн 88 кг-д хүч сорьсон  Э.Содномпилжээ эхний захиалгаараа 210 кг өргөсөн. Харамсалтай нь удаах хоёр захиалгаараа 217 кг-ыг шахсан ч шүүгч тооцоогүй. Ийнхүү тэрээр хүрэл медаль хүртсэн юм. Хэрвээ манай тамирчин 217 кг-ыг өргөсөн бол мөнгөн медаль хүртэх байлаа.

2012 оны Лондонгийн паралимпод манай улсаас зургаан тамирчин оролцож байсан бөгөөд медаль хүртээгүй юм.

Эх сурвалж: Rio2016