НҮБ-ын энхийг сахиулах ажиллагаанд үүрэг гүйцэтгэх Монголын Зэвсэгт хүчний зургаадугаар ээлжийн мотобуудлагын батальоны 850 цэргийн алба хаагч Өмнөд Суданыг зориход бэлэн болжээ.

Тэд өнөөдөр Монгол цэргийн оройн дээд сүлд Зэвсэгт хүчний Жанжин туг болон Бүх цэргийн Их хар сүлдэндээ хүндэтгэл үзүүлэх юм.

Хурандаа Б.Бат-Эрдэнэ захирагчтай үүрэг гүйцэтгэх Монголын цэргийн багт Зэвсэгт хүчний 40 гаруй анги байгууллагын 700 гаруй, Үндэсний аюулгүй байдлыг хангах тусгайлсан чиг үүрэг бүхий ХХЕГ, ЦЕГ, ТЕГ, ОБЕГ, ШШГЕГ, ХСИС-ийн 100 гаруй алба хаагч багтжээ.

Нийт 850 гаруй хүний бүрэлдэхүүнтэй цэргийн алба хаагчдын 40 гаруй хувь нь олон улсын болон НҮБ-ын мандаттай энхийг дэмжих ажиллагаанд оролцсон туршлагатай залуус бөгөөд 40 гаруй эмэгтэй алба хаагчид үүрэг гүйцэтгэх юм.

Өмнө нь Өмнөд Судан дахь НҮБ-ын энхийг сахиулах ажиллагаанд Монгол улсаас 850 хүнтэй мотобуудлагын батальон 2012 оноос эхлэн оролцож, нийтдээ таван ээлжинд 4250 цэргийн алба хаагч үүргээ амжилттай гүйцэтгээд байна.