Кёкүтэнхо Н.Цэвэгнямын зодог тайлах албан ёсны ёслол өнөөдөр Токио хотын  "Рёогокү" дахь сүмогийн төв өргөөнд боллоо.

Арлын Япон улсын мэргэжлийн сүмод Монгол бөхчүүдийг түүчээлэн барилдсан Кёкүтэнхо Н.Цэвэгням Нагоя башёгоор зодог тайлж байгаагаа зарласан билээ.

1992 оны хоёрдугаар сард тэр үеийн  “Оошима” дэвжээнд Н.Цэвэгням, Д.Батбаяр ,Б.Энхбат ,Ц.Батжаргал Мөнхболд ,Түмэндэмбэрэл гэсэн 15-16 насны зургаан хөвгүүн сүмогоор барилдахаар орчуулагч Цэвээнсүрэн гуайн хамтаар анх хөл тавьсан.

Мөн оны гуравдугаар сарын Осака башёд анх Монголын бөх зодоглож тэр үеэс сүмогийн ертөнц дэх монголчуудын хуудас нээгджээ.  Эхний зургаан хүүхэд эх орон ,элгэн садан ,эх эцгээс хол түүний дээр цаг агаар, хэл соёл зан заншил амьдрах орчин  тэс өөр ертөнцөд дасан зохицоход тохиосон бэрхшээл, ар гэрийн амьдрал зэргээс шалтгаалан дөрвөн сүмоч нутаг буцсан.  Багш Оошима журмын нөхөр Б. Энхбатын ятгалгаар Н.Цэвэгням Д. Батбаяр нар дахин барилдаж эхэлсэн түүхтэй.

Үүнээс хойш 24 жилийн дараа буюу 2016 оны тавдугаар сарын 29-ны энэ өдөр Кёкүтэнхогийн зодог тайлах ёслолоо хийлээ.

Зодог тайлах ёслолд 8000 гаруй хүн оролцож гэр бүл найз нөхөд, сүмочид, урлаг, спортын соёлынхон гээд 420 хүн дэвжээнд гарч түүний гэзэгт гар хүрлээ. 

Японы “Бейсбол магазин” спортын сэтгүүлийн сүмо хариуцсан гэрэл зурагчин В.Даваа Токио хотоос фото нийтлэл илгээлээ.