Оффшор данстай улстөрчдийг Эрүүгийн гэмт хэрэгтэй тэмцэх тасгаас шалгаж байгаа талаар сайтууд мэдээлэх болсон.

Энэ талаар Цагдаагийн байгууллагаас тодруулахад “шалгах эрх зүйн үндэслэл байхгүй. Тийм учраас шалгаагүй” гэлээ. Өөрөөр хэлбэл Монгол Улсад оффшор данстай холбоотой хууль байхгүй юм.

Кёкүшюзан Батбаяр өөрийн хүсэлтээр шалгуулах өргөдлөө АТГ-т өгсөн.

Ерөнхийлөгч Ц.Элбэгдорж оффшор дансанд нэр нь холбогдсон улстөрчид энэ жилдээ улстөрөөс ангид байхыг сануулсан. Тэгэхээр нэр нь холбогдсон С.Баярцогт, Сү.Батболд, Д.Цогтбаатар, Кёкүшюзан Батбаяр, Б.Дэлгэрсайхан /Дорноговь аймгийн МАН-ын гишүүн/ нарыг энэ жилдээ сонгуульд өрсөлдөөд хэрэггүй гэсэн эелдэг зөвлөгөө гэж ойлгож болох юм.

Харин хүүгийнх нь нэр холбогдсон Э.Бат-Үүл хотын захирагчид Ерөнхийлөгч чухам юу гэж зөвлөх бол.

Кёкүшюзан Батбаярын хувьд зургаадугаар сард болох Цэвэгнямын зодог тайлах ёслолд оролцож, дэвжээн дээр гарахаар бэлтгэл хийж буй. Тэгэхээр сонгуульд оролцохгүй гэх албан ёсны мэдээлэл байхгүй ч бөхийн бэлтгэл хийгээд юун сонгуультай манатай байгаа.

Үлдсэн хүмүүсийн хувьд нэр дэвшихээр зэхэж байгаа юм.