НҮБ-аас Монгол улсын засгийн газарт өвөлжилт, хаваржилт хүндэрсэн аймгуудад амьдарч байгаа малчин өрхүүдийг хэрэгцээтэй зүйлээр хангахад тусламж үзүүлж байна. Тусламжийг НҮБ-ын Онцгой байдлын үеийн яаралтай тусламжийн сангийн 2.4 сая долларын санхүүжилтээр хэрэгжүүлжээ.

Үүнээс 800 мянган ам. доллар нь хөдөө аж ахуйн тусламжид хуваарьлагдсан бөгөөд Монгол Улсын Хүнс, хөдөө аж ахуйн яам, НҮБ-ын Хүнс, хөдөө ахуй байгууллага хамтран өвөлжилт, хаваржилт хүндэрсэн аймгуудын малчдад өвс тэжээл, ядарч доройтсон малын эрүүл мэндийг дэмжих сувилалын багцыг бэлтгэж, хүргүүлэх ажлыг зохион байгуулсан юм.

Тусламжийн багцыг өвөлжилт, хаваржилт хүндэрсэн Увс, Завхан, Баянхонгор, Архангай, Дундговь, Сүхбаатар гэсэн зургаан аймгийн 45 сумын 4390 өрхөд орон нутгийн засаг захиргааны нэгжээр дамжуулан хүргэх аж.

Түүнчлэн малын асаргаа, сувилгааны бүтээгдэхүүнийг хайрцагт савлах, зөөх ажилд Хөдөө аж ахуйн дээд сургуулийн оюутнууд, Австрали, БНСУ-ын сайн дурын ажилчид сайн дураараа оролцож хүнд хэцүү цагт хөдөөгийн малчдад туслах сайн үйлсд өөрсдийн хувь нэмрээ орууллаа.

Гэрэл зургийг: Төгөл Tugul photography

Гэрэл зургийг: Төгөл Tugul photography