Эмч нар шударга ёсонд нийцсэн хариуцлага хүлээлгэхийг шаардаж өчигдөр төв талбайд жагсаал хийсэн.

Тэд ирэх есдүгээр сарын 1-ний өдрөөс эхлэн дагаж мөрдөх Эрүүгийн хуулийн шинэчилсэн найруулгын 15.1 дүгээр зүйлд "Эмнэлгийн мэргэжилтэн хүний эрүүл мэнд, амь насанд хохирол учруулсан тохиолдолд 1-3 жил эмчлэх эрхээ хасуулж, 20-80 сая төгрөгийн торгох ял эсвэл 2-8 жил хорих ял эдэлнэ" гэж заасан нь хэтэрхий чанга бөгөөд хүний эрүүл мэндэд хүнд хохирол санаатай учруулсан гэмт хэргийн эрүүгийн хариуцлагатай адил гэж үзэж байгаа юм.

Харин эсэргүүцлийн жагсаалын дараа Монгол Улсын Ерөнхийлөгч Ц.Элбэгдорж Эрүүл мэнд, спортын яамны төрийн нарийн бичгийн дарга С.Ламбааг дуудаж эмч нарын саналыг хуульд тусган өөрчилвөл, өргөн барина гэдгээ илэрхийлжээ.

Монголын эрүүл мэндийн ажилтны ҮЭ-ийн хорооноос Эрүүгийн хуулийн шинэчилсэн найруулгыг эсэргүүцсэн 10 мянган эмч, эмнэлгийн ажилтны гарын үсэгтэй шаардах бичгийг Ерөнхий сайд Ч.Сайханбилэг, Хууль зүйн сайд Д.Дорлигжав, Шадар сайд, Засгийн газрын гишүүн, ЭМС-ын сайдын үүрэг гүйцэтгэгч Ц.Оюунбаатар, УИХ-ын Хууль зүйн байнгын хорооны дарга Б.Ганбат, УИХ-ын Өргөдлийн байнгын хорооны дарга Ж.Батзандан, УИХ-ын дарга З.Энхболд нарт өчигдөр хүргүүлсэн.

Тэд уг шаардлагынхаа хариуг энэ сарын 29-нд авах юм. Хэрэв заасан хугацаанд шаардлагын хариуг өгөхгүй бол дараагийн арга хэмжээгээ авч тэмцлийн өөр хэлбэрт шилжинэ гэдгээ албан ёсоор мэдэгдсэн.