Одоогоор энэ асуултын хариулт тодорхойгүй байна.

Өчигдөр үдээс хойш болсон, УИХ-ын нэгдсэн хуралдаанаар МАН-ын гишүүд Ерөнхий сайдаас дараагийн сайд нарын талаар шалсан ч Ерөнхий сайд, УИХ-ын даргын аль аль нь ганхийсэнгүй. Та нар зунжин хэн хэнийг томилохоо ярилцсан гээ биз дээ, дараагийн сайд нарын нэрсээ яагаад хамтад нь оруулж ирсэнгүй вэ хэмээн асуух гишүүд байсан.

Ерөнхий сайд Ч.Сайханбилэг, АН-ын дарга З.Энхболд нар шинэ сайд нарын нэрс дээр эцсийн тохиролцоонд хүрээгүй байна. Ерөнхий сайд танхимын шинэ гишүүдээ парламентын гаднаас томилох хүсэлтэй байгаа бол намын дарга өөр байр суурьтай байгаа аж. Иймд Ерөнхий сайд АН-ын Үндэсний зөвлөлдөх хороог (ҮЗХ)-г хуралдуулж, шинэ сайд нараа “сойх” бэлтгэлдээ оржээ.

АН-ын ҮЗХ нийт 222 гишүүнтэй. Тэдгээрийн 80 орчим нь орон нутгийн гишүүд учир яаралтай хуралдсан тохиолдолд ирж чадахгүй. ҮЗХ-г хуралдуулахын тулд нийт гишүүдийн 1/3-ийн гарын үсгийг цуглуулсан байх ёстой. Иймд Ерөнхий сайд гарын үсэг цуглуулах гээд завгүй байна.     

Гэхдээ энэ удаад ч намын даргын сценариар үйл явдал өрнөж болзошгүй. З.Энхболд дарга ҮЗХ биш Гүйцэтгэх зөвлөл хуралдахад л хангалттай гэвэл 30 орчим гишүүнтэй энэ зөвлөл дараагийн 6 сайдын нэрсийг тодруулж болзошгүй юм.

Аймаг бүрийн нэг төлөөлөл, Улаанбаатар хотын дүүрэг тус бүрийн нэг төлөөлөл, нэмээд намын дарга, намын нарийн бичгийн дарга, намын нийслэлийн дарга нар гээд 30 орчим хүн АН-ын Гүйцэтгэх зөвлөлийг бүрдүүлдэг юм.