-Сүүлийн 10 сарын хугацаанд орон сууцны борлуулалт тогтмол бууралттай байна-

Монголбанкны захиалгаар үл хөдлөх хөрөнгийн "Тэнхлэг зууч" компанийн хийсэн 2015 оны тавдугаар сарын "Орон сууцны үнийн индекс"-ийн судалгааг тус компанийн захирал Б.Батзориг танилцууллаа. ОСҮИ-ийг тооцоолохдоо нийт 4358 шинэ, хуучин орон сууцны мэдээллийг хамруулжээ.

Тус судалгаагар ОСҮИ тавдугаар сард 16,8 хувьтай гарчээ. Энэ нь өмнөх сараас 0,2 хувь өссөн үзүүлэлт юм байна. Харин оны эхэн үетэй харьцуулахад -1,8 хувь, өнгөрсөн оны мөн үетэй харьцуулахад -5,4 хувиар буурчээ.

Шинэ орон сууцны үнийн индекс 26,7 хувьтай гарлаа. Энэ нь өмнөх сараас -0,4 хувиар буурсан үзүүлэлт юм. Харин оны эхэн үеэс -0,03 хувиар буурч, өнгөрсөн оны мөн үетэй харьцуулбал 0,5 хувиар өссөн байна.

Хуучин орон сууцны үнийн индекс 10,0 хувьтай гарлаа. Энэ нь өмнөх сараас -0,6 хувиар, оны эхэн үеэс -5,3, өнгөрсөн оны мөн үеэс -9,8 хувиар буурсан үзүүлэлт юм.

МУИС-ийн багш судлаач Д.Бямбасүрэнгийн хэлснээр хуучин, шинэ орон сууцны үнэ бууралттай байгаа ч нийт ОСҮИ өсөлттэй гарсан. Гэхдээ дээр хэлсэнчлэн 0,2 хувь, -0,4 хувь, -0,6 хувь нь маш бага буюу бараг өөрчлөлтгүй үзүүлэлтүүд гэж ойлгож болох гэнэ.

Түүнчлэн зах зээлд нийлүүлэгдэж байгаа орон сууцны тоо тогтмол байгаа хэдий ч борлуулалт буурч, иргэдийн худалдан авах чадвар мөн буурсан үзүүлэлттэй гарчээ. Сүүлийн 10 сарын хугацаанд тогтмол бууралттай байна гэж "Тэнхлэг зууч" компанийн захирал хэллээ.

• Энэ оны эхний таван сарын байдлаар орон сууцны борлуулалт 2014 оны мөн үетэй харьцуулахад 27 хувиар буурсан
• Энэ оны дөрөвдүгээр сард 950 орчим хуучин орон сууц зарагдсан бол тавдугаар сард 850 болж буурчээ. Өнгөрсөн онтой харьцуулахад 19 хувиар буурсан үзүүлэлт гарсан
• Мөн шинэ орон сууцны барилгын ажил зогссон байгаа нь өмнөх оны энэ үетэй харьцуулахад 7 дахин их байна гэв.