Баянгол дүүргийн 14 дүгээр хорооны 16 дугаар байранд үүссэн нөхцөл байдлын дагуу засаг дарга онцгой комиссын дарга Д.Оросоо мэдээлэл хийлээ.

Тэрээр нүүлгэн шилжүүлэх болон бусад ажиллагааны зардлыг Нийслэлийн Засаг даргын нөөц хөрөнгөөс гаргаж тухайн буруутай эзнээр нөхөн төлүүлэхээр шийдвэрлэсэн гэдгийг хэллээ.

Зөвшөөрөл олгосон этгээдүүдэд ч хуулийн хариуцлага тооцох учиртайг тэрбээр хэлсэн.

16-р байрны урд талд “Би жи би жи” ХХК эзэмшлийн газарт 18 давхар орон сууц барих зөвшөөрлийг 2014 оны долдугаар сарын 22-нд Барилга хот байгуулалтын яамнаас олгосон байна. Иргэдээс удаа дараа гомдол ирсний дагуу Дүүргийн Засаг дарга холбогдох байгууллагуудад албан бичиг явуулж байжээ. "Би Жи Би Жи" ХХК 2008 онд анх грааж үйлчилгээний чиглэлээр хэмээн газар эзэмших зөвшөөрөл авч байжээ.

“Би Жи Би Жи” ХХК компанийг төлөөлж Ганбат хэмээх хүн Баянгол дүүргийн онцгой комиссын хуралд суусан байна. Тэрээр "үүссэн нөхцөл байдалтай холбогдуулж гарах зардлыг хариуцна. Гэхдээ одоо санхүүгийн хувьд шууд гаргах боломж байхгүй" гэдгийг хэлжээ. Ийм учраас нүүлгэн шилжүүлэх болон бусад ажиллагааны зардлыг Нийслэлийн Засаг даргын нөөц хөрөнгөөс гаргаж дараа нь нөхөн төлүүлэхээр болжээ.

Ухсан газрын нүхийг мэргэжлийн байгууллагын дүгнэлт гаргуулан цутгалт хийж хэвийн байдалд оруулах шийдвэр гаргасан гэдгийг Засаг дарга Д.Оросоо хэллээ. Мөн Нийслэлийн онцгой комиссын хурлаар тухайн газарт барилга барихаар гаргасан шийдвэрийг хүчингүй болгох шийдвэр гаргажээ.

Оршин суугчдын байрыг цагдаагийн болон мэргэжлийн хяналттай хамтран гэрийн эздийг байлцуулан лацдаж баталгаажуулан хамгаалалтанд авсан байна. Байрны гадна хамгаалалтанд Онцгой байдал, Цагдаа, Мэргэжлийн хяналтын байгууллага болон тухайн хорооны нийт 22 албан хаагч томилогдон ажиллаж байна.