Нийслэлийн Баянгол дүүргийн 14 дүгээр хорооны 16 дугаар байр хөрсний гулгалтад өртөж болзошгүй гэх мэдээллийн дагуу өчигдөр Нийслэлийн болон дүүргийн онцгой комисс 16:30-18:10 цагийн хооронд хуралдаж, иргэдийг нүүлгэн шилжүүлэх шийдвэр гарган 20:00 цагт ажиллагааг эхлүүлжээ.

Энэ талаар Нийслэлийн онцгой байдлын газраас тодруулахад “18 давхар байшин барих зориулалттай ухсан фундаментийн нүхний хананы шороо нурж эхэлсэн. Тиймээс 6 метрийн зайтай орших 16-р байранд цууралт өгөх аюултай тул Онцгой байдлын газраас шуурхай арга хэмжээ авч хамгаалалтанд аван, оршин суугчдыг яаралтай нүүлгэн шилжүүлсэн” гэлээ.

Нийт 48 өрхийн 244 оршин суугчдаас 178 иргэнийг долоон зочид буудалд хуваан байрлуулж халуун хоол ундаар хангасан байна.

Тус ажиллагаанд дүүргийн онцгой комиссоос 21 албан хаагч, Онцгой байдлын хэлтсээс 41 албан хаагч, цагдаагийн хэлтсээс 50 албан хаагч, мэргэжлийн хяналтаас 40 албан хаагч, ус дулаанаар хангах, эрчим хүчээр хангах алба, эрүүл мэндийн нэгдэл, прокурор, хороо зэрэг холбогдох байгууллагуудаас нийт 173 албан хаагч оролцжээ.

Нүүлгэн шилжүүлэх ажиллагаа 23:37 цагт дуусч байрны бүх айлын хаалгыг лацдан жижүүрийн бүрэлдэхүүнд хүлээлгэн өгчээ.

Жижүүрийн бүрэлдэхүүнд цагдаагийн 17 албан хаагч, онцгой байдлын хэлтсийн хоёр, замын цагдаагийн хоёр, мэргэжлийн хяналтын нэг албан хаагч үүрэг гүйцэтгэж байна.

НИТХ-ын дарга Д.Баттулгаас тус байрыг хамгаалалтанд авах ажиллагаа хэдий хугацаанд үргэлжлэх талаар асуухад “Маш богино хугацаанд хиймээр байна. Буудалд амьдарна гэдэг утгагүй шүү дээ” гэлээ.

Түүнээс авсан тодруулгыг доорх видео бичлэгээс хүлээн авна уу. /Оператор Д.Жавхлантөгс/