УИХ-ын хаврын чуулганаар Үндсэн хуульд нэмэлт, өөрчлөлт оруулах тухай асуудлыг хэлэлцэхээр болсон. Үндэсний судлаачдын баг шинэ Үндсэн хуулийн хэрэгжилтэд судалгаа хийн дүгнэлт гаргажээ.

23 жилийн хугацаанд манай улсад хоёр л Засгийн газар бүрэн эрхийн хугацаагаа гүйцээж ажилласан байна. Мөн хэдхэн сарын настай Засгийн газар ажиллаж байлаа. Засгийн газрын дундаж наслалт 28 сар байгаа нь төрийн бодлогыг тогтвортой хэрэгжүүлэхэд саад болж, улс орны хөгжилд сөрөг нөлөө үзүүлж байна.

Энэ нь Үндсэн хуулийг цоорхойг харуулж буй гэрч. Тиймээс эцэг хуульдаа зайлшгүй өөрчлөлт оруулах цаг болсон. Уг хуулийг УИХ-ын хаврын чуулганаар хэлэлцүүлэхээр төлөвлөсөн гэж Төрийн байгуулалтын байнгын хорооны дарга А.Бакей хэлсэн.

1992 онд батлагдсан шинэ Үндсэн хуулийг 20 гаруй жил дагаж мөрдсөн ч өнөөгийн нийгэм, улс төр цаг үеийн байдлын онцлогт тохируулан зайлшгүй өөрчлөлт оруулах шаардлагатай гэсэн дүгнэлт гарсан.

Энэ дүгнэлтэд үндэслэн УИХ-ын дарга захирамж гарган, шинэ Үндсэн хуулийг батлалцахад оролцож байсан УИХ-ын долоон гишүүн багтсан Ажлын хэсгийг намрын чуулган завсарлахын өмнөхөн байгуулсан билээ.

Монгол Улсын Үндсэн хуульд нэмэлт, өөрчлөлт оруулах тухай хуулийн төсөл боловсруулах үүрэг бүхий ажлын хэсгийг УИХ-ын гишүүн Н.Батбаяр ахалж, бүрэлдэхүүнд нь УИХ-ын гишүүн Н.Батцэрэг, С.Баярцогт, Л.Болд, Р.Гончигдорж, Д.Дэмбэрэл, Д.Лүндээжанцан, Л.Цог болон С.Оюун нар багтсан бөгөөд тэд намрын чуулганы завсарлагаанаар ажиллах үүрэг хүлээсэн.

Ажлын хэсгийнхэн 2000 онд оруулсан дордуулсан гэх долоон өөрчлөлтийг эргэж харна. Мөн Засгийн газрын бие даасан байдлыг хэрхэн хангах, УИХ-ын гишүүн, Засгийн газрын гишүүний ажлыг хавсарч хийх, эсэх, түүнчлэн засаг захиргааны нэгжийн хуваарилалтын тухайд хот гэдэг статус байх уу, үгүй юү зэрэг асуудалд гол анхаарлаа хандуулан ажиллах юм байна.