Дэлхийн шилдэг баритон Э.Амартүвшинд Ерөнхийлөгчийн зарлигаар Ардын жүжигчин цол хүртээлээ.

Тэрээр сэтгэгдлээсээ хуваалцахдаа "Өнөөдөр миний амьдралд хэзээ ч мартагдахааргүй гайхамшигтай түүхэн сайхан өдөр болж байна.

Өндөр дээд төр маань, эрхэм төрийн тэргүүн маань Монгол Улсын Ардын жүжигчин хэмээх нэр хүндтэй сайхан шагналыг олголоо. Багахан зэрэг хөдөлмөрлөсний, олон улсад эх орныхоо нэрийг гаргасныг маань өндрөөр үнэлж энэ шагналыг олголоо гэж бодож байна. Монголынхоо нийт ард түмэнд, төрүүлж өсгөсөн аав ээж, эрдэмтэн багш нартаа, ажлын хамт олон хань ижил, найз нөхөд,  ах дүү төрөл төрөгсөд, намайг таньдаг хүн болгонд талархлаа илэрхийлж байна" гэлээ.

Дэлхийн чансаатай бүх л том театруудад дуулсан

Э.Амартүвшин цааш нь "Багадаа бусдын л адил өвөө эмээгийндээ очоод хонь мал хариулаад, морь унаад л, багаасаа дуулах дуртай хүүхэд байсан. Төрөлхийн л дуу хуурд дуртай хүүхэд байсан. Эргэлт буцалтгүйгээр дуучин болохоор шийдээд СУИС-д элсэж, олон сайхан багш нараар заалгаж, дуурь, сонгодог урлагийн амт шимтэд ороод одоо хүртэл энэнийхээ төлөө явж байна. Ямар нэгэн зүйл рүү хазайлгүй, зөвхөн хүсэж мөрөөдсөн зүйлийнхээ хойноос явсны үр шим гарч, ард түмэн төр засаг маань өндрөөр үнэлж, энэ сайхан шагналыг өгсөн гэж бодож байна. Энэ нэр хүндийг өшөө улам өндөрт өргөж, дааж явахын төлөө хичээнэ гэж бодож байна.

Ойрын ирээдүйд уралдаан тэмцээнд оролцох уу гэх сэтгүүлчийн асуултад "Миний хувьд уралдааны нас дууссан. Одоо дэлхийн том театруудаар олон улсад мэргэжлээрээ дуулж байна. Дэлхийн чансаатай бүх л том театруудад дуулсан. Итали, Европ, Америкийн театруудад дуулсан.  Хоёроос гурван жилийн төлөвлөгөө гарчихсан, дуугаа дуулаад л явж байна" хэмээн ярилаа.

Гэрэл зураг: Г.Өнөболд